Bernardo Silva: “Mövsümün ən vacib oyunlarından birinə belə çıxmaq ədalətli deyil”.

90plus.az xəbər verir ki, Silva iki klub arasında bərpaya ayrılan vaxt fərqinə etiraz edib.

"Mançester Siti” Çempionlar Liqasındakı debüt oyununu cümə axşamı “Napoli”yə qarşı keçirdi, “Arsenal” isə öz matçını artıq çərşənbə axşamı “Atletik” ilə oynamışdı. Nəticədə bazar günü Premyer Liqadakı birbaşa dueldən öncə iki komanda arasında 50 saatlıq bərpa fərqi yarandı.

London klubuna qarşı 1:1 hesablı heç-heçədən sonra Bernardo Silva bu vəziyyətə sərt etiraz edib:

“Mən bunu uduzmadığımız üçün deyirəm. Əgər uduzsaydıq, heç nə deməzdim. Amma bu, reallıqdır: mövsümün ən önəmli oyunlarından birinə belə istirahətsiz çıxmaq düzgün deyil. Onların beş günü var idi, bizim isə cəmi iki yarım gün. Bu, ədalətli deyil.”

Portuqaliyalı futbolçu həmçinin fiziki durumunun ideal olmadığını qeyd edib:

“Oyun zamanı özümü tam formada hiss etmirdim. Yüksək səviyyədə oynamayanlar bunun nə qədər çətin olduğunu anlaya bilməz. Biz dəyişiklik istəyirik, amma heç vaxt dəyişmir. Ola bilər, bizim üçün fərqi yoxdur, amma azarkeşlər, klublara hörmət və turnirin ədalətliliyi baxımından bu, qəbulolunmazdır.”