“Qarabağ”ın baş məşqçisi Qurban Qurbanov Azərbaycan kubokunun yarımfinal mərhələsinin cavab oyununda “Sabah”a qarşı keçirilən matçdan (2:1) sonra mətbuat konfransında səsləndirib.

90plus.az xəbər verir ki, təcrübəli mütəxəssis bildirib ki, qarşılaşma sonadək mübarizə şəraitində keçib:
“Futbolçularıma təşəkkür edirəm. Sona qədər döyüşdülər. Azarkeşlərin də oyundan zövq aldığını düşünürəm”.

Oyunun taleyini həll edən penalti epizoduna toxunan baş məşqçi qərarın mübahisəli olduğunu gizlətməyib:
“Epizoda baxanda topun ələ dəydiyini görmək olurdu. Amma bu barədə qəti fikir bildirmək istəmirəm. Hakim yəqin ki, açıqlama verəcək. Belə anlar oyuna əlavə gərginlik qatır”.

Qurbanov rəqib komandanın qələbəsini də yüksək qiymətləndirib:
“Kim nə deyirsə desin, ‘Sabah’ bu oyunda finala layiq olduğunu göstərdi. Hətta hesab 2:2 olsaydı belə, bizim üçün çətin olacaqdı”.

VAR sisteminə müraciət edilməməsi ilə bağlı sualı cavablandıran mütəxəssis maraqlı fikir səsləndirib:
“Əgər VAR-a baxılmayıbsa, deməli, onların öz arqumentləri var. Adətən VAR-a gedəndə qərar dəyişir. Hakimlik çox çətin sahədir”.

Oyundan sonra yaşanan gərginlik barədə danışan baş məşqçi bunu futbolun təbiəti ilə əlaqələndirib:
“Belə emosiyalar futbolda olur. Bəzən hətta böyük turnirlərin finallarında da oxşar hallar yaşanır. Bu da oyunun bir hissəsidir”.

Hakimlərə edilən təzyiqlərə də toxunan Qurbanov onların çətin vəziyyətdə olduqlarını bildirib:
“Onların üzərində böyük basqı var. Bəzən qərar verməkdə tərəddüd edirlər. Düşünürəm ki, bu məsələlərə daha anlayışla yanaşmaq lazımdır”.

Komandasının son dönəmdəki çıxışına da münasibət bildirən baş məşqçi yorğunluq faktorunu ön plana çəkib:
“Çempionlar Liqası bizi çox yordu. Bu, dünya futbolunda da görünən haldır. Uzun müddət zirvədə qalmaq çətindir”.

Qurbanov azarkeşlərə də mesaj göndərib:
“Azarkeşlərimiz hər zaman yanımızda olub. Belə oyunlar komandaları daha da gücləndirir”.

Qırmızı vərəqə epizodu barədə isə daha sərt danışıb:
“Açığını desəm, bu qərar mənə ağır gəldi. Belə oyunda bu cür qırmızı vərəqə vermək çox sərt idi”.

Sonda hakimlərin ümumi çıxışını dəyərləndirən mütəxəssis əlavə edib:
“Potensiallı hakimlərimiz var. Sadəcə bu mövsüm onlar üçün çətin keçir. Ümid edirəm ki, gələcəkdə daha stabil qərarlar verəcəklər”.