Dambrauskas: “Bizə qarşı hörmətsizlik qəbuledilməzdir”.
90plus.az xəbər verir ki, “Sabah”ın baş məşqçisi Valdas Dambrauskas “Turan Tovuz” üzərində qazanılan 2:1 hesablı qələbədən sonra emosional açıqlamaları ilə diqqət çəkib.
Mövsümün son oyununu dəyərləndirən litvalı mütəxəssis futbolçularını və azarkeşləri təbrik edib. O, komandasının ideal oyun göstərmədiyini etiraf etsə də, nəticənin önəmli olduğunu bildirib:
“Bərabər səviyyəli qarşılaşma oldu. Rəqibin yaxşı imkanları vardı, qapıçımız bizi xilas etdi. Mövsümün son matçlarında futbolçuları motivasiya etmək asan deyil. Hamı artıq fasiləni düşünür”.
Dambrauskas mətbuat konfransında ən sərt reaksiyanı isə “Qarabağ”ın avrokubok çıxışının “Sabah”ın uğuruna təsiri ilə bağlı suala verib. Baş məşqçi bu cür yanaşmanı komandaya qarşı hörmətsizlik hesab etdiyini bildirib:
“Çempionun, kubok sahibinin, 33 oyun məğlub olmayan komandanın evində belə sual vermək hörmətsizlikdir. Hətta Qurban Qurbanov bizim ən yaxşı olduğumuzu deyir. Amma yenə də bəhanələr axtarılır. Titullar qazandığımıza görə üzr istəməyəcəyəm”.
Çempionlar Liqasındakı hədəflərdən danışan 48 yaşlı məşqçi transfer çalışmalarının plan üzrə davam edəcəyini söyləyib. O bildirib ki, komanda iyunun ortalarında bir araya gələcək və rəqib müəyyənləşəndən sonra hazırlıq prosesi konkret plana uyğun qurulacaq.
Mövsümün ardından istirahət planlarından da danışan Dambrauskas əvvəlcə Litvaya gedəcəyini, daha sonra ailəsi ilə birlikdə ölkə xaricində dincələcəyini açıqlayıb. “Sabah”ın yay hazırlıq toplanışı isə Avstriyada keçiriləcək.
Coy Lens Mikelsin mümkün ayrılığı barədə suala cavab verən baş məşqçi futbolçunun qərarına hörmətlə yanaşdıqlarını deyib:
“Heç bir oyunçu komandadan böyük deyil. Mikels əla mövsüm keçirdi, amma biz bir futbolçudan ibarət komanda deyilik. Onun olmadığı oyunlarda da alternativlərimiz vardı”.
