Fransa millisinin baş məşqçisi Didye Deşam federasiya prezidenti Noel Le Qreyin Zinəddin Zidan haqqında dediklərinə münasibət bildirib. 90plus.az xəbər verir ki, o, yerli mətbuata açıqlamasında deyib: “Onun Zinəddin barədə dedikləri doğru deyildi. Məncə, Zizudan üzr istəməsi yerində atılan addım oldu və xoş qarşılanmalıdır. Futbolda elə bir vəziyyət yaranıb ki, sanki Zidanla mən qiyabi rəqabət aparırıq, hətta müxalifətin yaranmasından danışa bilərik. Sizi əmin edirəm ki, birgə yaşadıqlarımıza və paylaşdıqlarımıza görə Zizuya həmişə sonsuz hörmətim olacaq. Onun Fransa futbolu üçün etdikləri danılmazdır”. Xatırladaq ki, Le Qre müsahibələrinin birində Fransa millisinin keçmiş futbolçusu Zinəddin Zidanla bağlı sualı cavablandıraraq, Zidan ona zəng etsə, telefona cavab verməyəcəyini bildirmişdi. Le Qre daha sonra keçmiş futbolçudan üzr istəyib. Həmçinin futbol agenti Sonia Suid onu cinsi təcavüzdə ittiham edib.