Millimizin üzvü Mahir Emrelinin çıxış etdiyi "Dinamo"da (Zaqreb) gərginlik yaşanıb. 90plus.az Xorvatiya mətbuatına istinadən xəbər verir ki, komandanın kapitanı Arijan Ademi ilə rəhbərlik arasında münaqişə olub. Xarici klublardan təklif alan oyunçu bununla bağlı məlumat vermək üçün rəhbərlik və idman sektorunun nümayəndələri ilə görüşüb. Ancaq klub onun transferinə qarşı çıxıb. Futbolçu bu qərara kəskin reaksiya göstərib. "Dinamo"nun mətbuat xidməti bu məsələ ilə bağlı bəyanat yayıb. Bəyanatda bildirilir: "Kapitan Arijan Ademi ilə rəhbərlik, idman direktoru və məşqçi arasında heç bir münaqişə olmayıb. Ademi  klubun binasında olub, xaricdən müəyyən klubların onun transferində maraqlı olduğu barədə məlumatı çatdırmaq üçün rəhbərlik və idman sektorunun nümayəndələri ilə görüşüb. Bundan sonra klub rəhbərliyi idman direktoru və məşqçi ilə birgə yekdilliklə kapitan Arijan Ademinin “Dinamo”da qalması lehinə mövqe bildirib və əsas komandanın kapitanı ilə yeni müqavilə imzalaması təklif olunub". Qeyd edək ki, 2010-cu ildən "Dinamo"da oynayan 31 yaşlı yarımmüdafiəçi burada 351 oyuna çıxıb, 39 qol vurub, 29 qolun ötürməsini verib.