"Flamenqo"nun "Esperans" üzərində inamlı 2:0 qələbəsi "Çelsi"yə mesaj oldu...
90plus.az xəbər verir ki, Braziliya təmsilçisi "Flamenqo" bu gün Tunisin "Esperans" klubu üzərində inamlı 2:0 hesablı qələbə qazanaraq FIFA-nın yeni formatda keçirilən Klublararası Dünya Çempionatında “D” qrupunun favoritlərindən olan “Çelsi”yə ciddi siqnal göndərdi.
Çünki Braziliya Kubokunun qalibləri növbəti oyunlarında Filadelfiya şəhərindəki Linkoln stadionunda "Çelsi" ilə qarşılaşacaq. Bu qarşılaşma, böyük ehtimalla, qrup liderini müəyyən edəcək.
Xatırlatma: Avropa təmsilçiləri son on il ərzində Klublararası Dünya Çempionatında məğlubiyyət yaşamayıblar. Sonuncu dəfə 2012-ci ildə “Çelsi” “Korintians”a uduzmuşdular. O vaxtdan bəri Avropa komandaları 27 oyundur, məğlub olmur.
"Palmeiras" və "Boka Xuniors" da bu turnirdə "Portu" və "Benfika"ya qarşı qələbəyə yaxın idilər, bu isə Cənubi Amerika komandalarının Avropa hegemoniyasını sındırmaq potensialını göstərir. Qrup mərhələsində Avropa təmsilçilərinə qarşı daha altı oyun keçiriləcək.
"Flamenqo" isə artıq bir aydan çoxdur məğlub olmur və Braziliya çempionatına liderlik edir. Komandanın baş məşqçisi, “Atletiko Madrid”in keçmiş müdafiəçisi Felipe Luisin rəhbərliyi ilə "Flamenqo" sabit və taktiki baxımdan güclü futbol nümayiş etdirir.
