Albaniyanın paytaxtı Tiranada keçirilən güləş üzrə Avropa çempionatı davam edir və Azərbaycan qadın millisi bu gün növbəti görüşlərini keçirib.

90plus.az xəbər verir ki, 59 kq çəki dərəcəsində mübarizə aparan Günay Qurbanova bürünc medal uğrunda görüşdə neytral ölkə təmsilçisi (belaruslu) Marta Getmanovananı 7:5 hesabı ilə məğlub edərək turniri mükafatla başa vurub.

İki güləşçi sabah bürünc üçün çıxış edəcək

57 kq-da Jalə Əliyeva yarımfinalda türkiyəli Elvira Kamaloğluna 2:6 hesabı ilə uduzub.

65 kq-da Birgül Soltanova isə gərgin keçən qarşılaşmada rusiyalı Alina Kasabiyevaya 10:11 hesabı ilə məğlub olub.

Hər iki güləşçi sabah bürünc medal uğrunda xalçaya çıxacaq.

Ruzanna yarışla vidalaşdı

62 kq çəki dərəcəsində çıxış edən Ruzanna Məmmədova 1/4 finalda neytral ölkə təmsilçisi Amina Tandelovaya 0:5 hesabı ilə məğlub olaraq mübarizəni dayandırıb.

Komandanın ümumi nəticəsi

Azərbaycan yığması turnirdə indiyədək ümumilikdə 5 medal qazanıb. Yunan-Roma güləşində:

• Həsrət Cəfərov (67 kq) – qızıl
• Qurban Qurbanov (82 kq) – qızıl
• Rəşad Məmmədov (55 kq) – bürünc
• Nihat Məmmədli (60 kq) – bürünc
• İslam Abbasov (87 kq) – bürünc

Yunan-Roma güləşi üzrə Azərbaycan millisi həm də komanda hesabında Avropa çempionu olub.