İngiltərə Çempionşipdə mövsümün son turu dramatik qarşılaşmalara səhnə olub.

90plus.az xəbər verir ki, türk iş adamı Acun Ilıcalının sahibi olduğu "Hull Siti" mövsümün final matçında səfərdə "Portsmut"la 1:1 hesablı bərabərlik əldə edərək liqada qalmağı bacarıb.

Çempionşipin 46-cı turunda baş tutan oyunda "Hull Siti" 18-ci dəqiqədə Mett Kruzun vurduğu qolla hesabı açdı. Lakin 55-ci dəqiqədə "Portsmut"dan Saydi cavab qolunu vurdu. Qalan dəqiqələrdə başqa qol olmayınca görüş bərabərliklə başa çatdı.

Bu nəticə ilə "Hull Siti" 49 xalla turnir cədvəlində 21-ci pillədə mövsümü başa vurdu və aşağı liqaya düşməkdən son anda xilas oldu. Eyni xala malik olan "Luton Taun" isə daha zəif top fərqi ilə 22-ci sıraya geriləyərək bir alt liqaya yuvarlandı.

Çempionşipdə "Luton Taun"la yanaşı "Plimut" və "Kardiff" də mövsüm sonunda liqanı tərk edən digər komandalar oldular.