İtalyan futbol məşqçiləri İsrailin beynəlxalq futbol turnirlərindən müvəqqəti olaraq uzaqlaşdırılmasını tələb ediblər.

90plus.az xəbər verir ki, İtaliyanın “ANSA” agentliyinin yaydığı məlumata görə, İtaliya Məşqçilər Assosiasiyası (“AIAC”) İtaliya Futbol Federasiyasının (“FIGC”) prezidenti Qabriyele Qravinaya məktub ünvanlayaraq, FIFA və UEFA-ya müraciət edilməsini istəyib. Məktubda əsas məqsəd kimi Qəzza üçün konkret addımlar atılması və İsrailin beynəlxalq turnirlərdən kənarlaşdırılması göstərilib.

“AIAC” bu çağırışı yalnız simvolik deyil, eyni zamanda təşkilatın rəhbəri Renzo Ulivyerinin fikirlərini əks etdirən mənəvi borc kimi təqdim edib.

Birliyin sədri Ulivyerinin sözlərinə görə: “İnsanlıq dəyərləri idmanın əsasını təşkil edir və bizi ağır nəticələrə səbəb olan təzyiq və zorakılığa qarşı çıxmağa məcbur edir.”

Birliyin sədr müavini Roberto Perondi isə bildirib: “Dünya alov içindədir. Fələstinlilər də daxil olmaqla, bir çox insan əziyyət çəkir. Laqeyd qalmaq olmaz.”

Qeyd: İtaliya millisi 2026-cı il dünya çempionatının seçmə mərhələsində 8 sentyabr və 14 oktyabr tarixlərində “İsrail”lə qarşılaşacaq.