Misli Premyer Liqasında yerli hücumçular arasında məhsuldarlığı ilə seçilən futbolçu müəyyənləşib.

90plus.az xəbər verir ki, “Qarabağ”ın forvardı Musa Qurbanlı mövsüm ərzində göstərdiyi performansla diqqət mərkəzinə düşüb. 24 yaşlı oyunçu 29-cu tur çərçivəsində “Neftçi”yə qarşı keçirilən səfər görüşündə komandasının 5:1 hesablı qələbəsində əsas rollardan birini oynayıb. Qurbanlı həmin qarşılaşmada iki dəfə fərqlənməklə yanaşı, bir məhsuldar ötürmə də edib.

Bu nəticədən sonra hücumçu cari mövsümdə Premyer Liqada vurduğu qolların sayını 7-yə yüksəldib. O, bu göstəriciyə 20 oyunda nail olub və bununla da yerli hücumçular arasında ən məhsuldar oyunçuya çevrilib.

Ümumilikdə isə çempionatda ən çox qol vuran azərbaycanlı futbolçu “Neftçi”nin yarımmüdafiəçisi Emin Mahmudovdur. Onun hesabında 9 qol var. “Qarabağ”ın universal oyunçusu Toral Bayramov da Musa Qurbanlı ilə eyni sayda – 7 dəfə rəqib qapılarına yol tapıb.