Braziliyanın “Santos” klubunda vəziyyət getdikcə daha da gərginləşir. Komanda daxilində artıq parçalanma müşahidə olunur və əsas səbəb yenə də ulduz futbolçu Neymardır.

90plus.az xəbər verir ki, son məlumatlara görə, Neymar artıq heyətdə hamı tərəfindən qəbul edilən fiqur deyil. Bəzi futbolçular onun davranışlarından açıq şəkildə narazıdır və xüsusilə məşqlərə, oyunlara münasibəti ilə yanaşı, özünü komandadan üstün tutması ciddi narahatlıq yaradır. Bununla belə, hələlik komanda daxilində kollektiv etiraz və ya açıq qarşıdurma baş verməyib.

Mənbənin bildirdiyinə görə, indiyədək yalnız Qonzalo Eskobar Neymarla üz-üzə gəlib və onunla birbaşa danışaraq narazılığını ifadə edib. Digər futbolçular isə vəziyyəti daha çox daxildə müzakirə etməklə kifayətlənir.

Xatırlatma: Neymar son vaxtlar yalnız komanda daxilində deyil, həm də azarkeşlər və futbol ictimaiyyəti tərəfindən tənqid olunur. Keçmiş futbolçu Zé Elias onu “uşaq kimi davranmaqda” ittiham etmişdi.

Statistika: 2026-cı ildə dizindəki zədə səbəbindən cəmi 8 rəsmi oyuna çıxan Neymar buna baxmayaraq 4 qol və 3 məhsuldar ötürmə ilə yadda qalıb. Lakin görünən odur ki, onun meydandakı performansından daha çox, davranışları gündəmi zəbt edir.