Misli Premyer Liqasına vəsiqə uğrunda pley-off oyununun formal ev sahibi müəyyənləşib.

90plus.az xəbər verir ki, Misli Premyer Liqasında yer uğrunda keçiriləcək pley-off qarşılaşması ilə bağlı nominal meydan sahibi məsələsinə aydınlıq gəlib.

Bu məqsədlə keçirilən püşkatma mərasimində Peşəkar Futbol Liqasının nümayəndələri, Premyer Liqanın 11-ci pilləsində qərarlaşan “Qəbələ” və I Liqada ikinci yeri tutan “Mingəçevir” təmsilçiləri iştirak ediblər.

Püşkatmanın nəticəsinə əsasən, qarşılaşmada nominal meydan sahibi kimi “Qəbələ” çıxış edəcək.

PFL-in qərarına görə, həlledici oyun 28 may tarixində Sumqayıtda yerləşən “SOCAR Polymer Arena”da baş tutacaq. Matç saat 18:30-da start götürəcək və “CBC Sport” vasitəsilə canlı yayımlanacaq. Görüşdə VAR sistemi də tətbiq olunacaq.

Beləliklə, Premyer Liqada qalmaq və ya yüksəlmək uğrunda həlledici duel artıq rəsmi tarix və məkanını alıb.