Tarixi uğura görə Özbəkistan millisinin hər bir futbolçisuna prezidentdən xüsusi mükafat - avtomobil hədiyyə olunub.
90plus.az xəbər verir ki, Özbəkistan milli komandası tarixində ilk dəfə olaraq Dünya Çempionatının final mərhələsinə vəsiqə qazanıb və bu böyük uğur ölkə rəhbərliyi tərəfindən yüksək qiymətləndirilib.
Özbəkistan Futbol Assosiasiyasının yaydığı məlumata görə, Prezident Şavkat Mirziyoyev yığma üzvlərini bu nailiyyətə görə dövlət mükafatları və dəyərli hədiyyələrlə təltif edib. Prezidentin xüsusi sərəncamına əsasən, futbolçulara mükafat olaraq “BYD Champion” markalı avtomobillər təqdim olunub.
Qeyd: Dövlət başçısı millinin Qətərlə keçirilən və 3:0 hesabı ilə başa çatan son seçmə oyununu paytaxtdakı “Bunyodkor” stadionunda canlı izləyib.
Qələbədən sonra stadionda xüsusi təltifetmə mərasimi keçirilib. Prezident Şavkat Mirziyoyev milli komandanın futbolçularına şəxsən dövlət mükafatlarını özü təqdim edib.
Təntənəli mərasim atəşfəşanlıqla yekunlaşıb və stadionda bayram ab-havası hökm sürüb. Özbəkistan xalqı bu tarixi qələbəni böyük coşqu ilə qeyd edib, futbolçular isə arenanı alqışlar altında tərk ediblər.
