"Barselona"nın futbolçusu Robert Levandovski Kataloniya klubuna keçməzdən əvvəl "Real"a transfer olunmaq istəyib. 90plus.az xəbər verir ki, bu barədə İspaniya mətbuatı məlumat yayıb. 34 yaşlı hücumçu ötən yay "Bavariya"dakı 7 illik çıxışından sonra klubunun dəyişdirilməsini istədiyini anlayıb. Daha sonra onn meneceri Pini Zahavi transfer bazarındakı durumu öyrənməyə başlayıb.  Zahavi müxtəlif klublarla əlaqə saxlayıb və onlara Levandovskinin "Bavariya"nı tərk etmək niyyətində olduğunu bildirib. Madrid təmsilçisinə keçid polyak üçün prioritet olduğu üçün ilk növbədə menecer "Real" ilə əlaqə saxlayıb. Levandovski "Real"a transferinin onun üçün doğru və ambisiyalarına uyğun olduğuna inanırdı. Üstəlik, həm forvard, həm də ailəsi İspaniyaya köçmək istəyirdilər. Levandovskinin "Real"a keçmək istəyinə baxmayaraq, Madrid klubu onu almaqdan imtina edib. La Liqa təmsilçisi hesab edirdi ki, Robert artıq çox yaşlı oyunçudur. Həmçinin komandada Kərim Benzema kimi bir forvard olduğuna görə "Real" Levandovskini istəməyib.  "Real"ın Levandovskidən imtina etməsindən sona isə "Barselona" onunla əlaqə saxlayıb. Robertin İspaniyada yaşamaq istəyi transferdə həlledici rol oynayıb.  Qeyd edək ki, Levandovski bu mövsüm "Barselona"nın heyətində bütün turnirlərdə 21 oyunda 19 qol vurub və 4 qolun ötürməsini verib.