“Real”ın baş məşqçisi Xabi Alonso La Liqanın 8-ci turunda “Vilyarreal” üzərində 3:1 hesabı ilə qazandıqları oyundan sonra Kilian Mbappenin zədəsi barədə açıqlama verib.

90plus.az xəbər verir ki, İspaniya mətbuatına əsasən, fransız hücumçu qarşılaşmanın 83-cü dəqiqəsində əvəz olunub. O, bundan iki dəqiqə əvvəl – 81-ci dəqiqədə komandasının üçüncü qoluna imza atmışdı.

Oyunsonrası açıqlamasında Xabi Alonso Mbappenin topuğunda yüngül narahatlıq olduğunu bildirib:
“Gözləməliyik. Onun durumunu izləməyə davam edəcəyik. Hazırda Mbappe yığmanın düşərgəsinə qoşulacaq”, – deyə baş məşqçi qeyd edib.

İspaniya mediası isə Mbappenin zədəsinin nə dərəcədə ciddi olduğunu dəqiq müəyyənləşdirməyin hələ mümkün olmadığını yazır. Bununla belə, futbolçunun Fransa millisinin DÇ-2026-nın seçmə mərhələsində Azərbaycan (10 oktyabr) və İslandiya (13 oktyabr) ilə keçirəcəyi oyunlarda iştirak etməməsi ehtimal olunur.

Qeyd: Bu mövsüm ərzində Mbappe “Real” forması ilə bütün turnirlərdə 12 matçda meydana çıxıb, 14 qol vurub və 1 məhsuldar ötürmə ilə yadda qalıb.