Klassik Mourinyo: Jurnalistlə dalaşır, rəqibi əsəbləşdirir və 1 xalla dönür.
90plus.az xəbər verir ki, “Benfika”nın baş məşqçisi Joze Mourinyo maaşı ilə bağlı suala əsəbiləşib, ardınca “Estadio do Draqau”da vacib bir heç-heçə əldə edib: 0-0
Mourinyo Portuqaliyada məşqçilik karyerasının əvvəlində olduğu kimi, hələ də qalmaqalların mərkəzində qalır.
Onun alovlu xarakteri Portuqaliya Liqasının 8-ci turunda keçirilən və qolsuz bitən “Portu” – “Benfika” derbisi ərəfəsində bir daha üzə çıxıb.
“Portu” 7 oyundan 21 xalla turnir cədvəlinin zirvəsində idi, “Benfika” isə 17 xalla 3-cü pillədə qərarlaşmışdı.
Mourinyo maaş sualına görə jurnalistlə toqquşdu
Mundo Deportivonun məlumatına görə, Mourinyo oyunöncəsi mətbuat konfransında “Benfika”dakı maaşı ilə bağlı sual veriləndə özündən çıxıb.
Jurnalist ona belə deyib:
“Klub üçün ucuz başa gəlməmisiniz, çox təsirli karyeraniz var.”
Mourinyo dərhal sərt cavab verib:
“Niyə oyunları maaşımla əlaqələndirmək istəyirsiniz? Sənin maaşın nə qədərdir, deyəcəksənmi? Yox? O zaman mənimkini də soruşma.”
Daha sonra o, kinayə ilə əlavə edib:
“Siz deyirsiniz ki, mən bahalıyam, amma həm də xəsisəm. Mən nə qədər qazanıram, nə qədər qazanmıram — fərqi nədir?”
Jurnalist məsələni aydınlaşdırmağa çalışanda Mourinyo sözünü kəsib:
“Siz sadəcə maaşım haqqında çox maraqlanırsınız.”
Mourinyo: “Biz yalnız 1 xal istəyirdik — və onu da aldıq”
Gərgin mətbuat konfransından sonra Mourinyo komandası ilə birlikdə “Portu”ya qarşı səfərdə 0:0 hesablı heç-heçə qazanıb — bu nəticəni isə o, “missiya yerinə yetirildi” kimi dəyərləndirib.
Sport TV-yə danışan Mourinyo bildirib:
“Biz yalnız 1 xal üçün gəlmişdik. Vəziyyət çətin idi. Futbolçulara dedim ki, risk edib uduza bilmərik.”
O, sözünə belə davam edib:
“Uduzmamaq çox vacib idi. ‘Sportinq’ də xal itirdi, biz hələ yarışdayıq. Sakit oynadıq, xarakter göstərdik.”
Portuqaliyalı mütəxəssis komandasının oyuna nəzarətindən razı qalıb:
“Qapıçımız Trubin bir dəfə də top dəf etmədi. ‘Portu’ yalnız bir dəfə dirəyə vurdu, vəssalam. Biz onları öz meydanlarında əziyyətə saldıq.”
Mourinyonun “Portu”ya düşmən qayıdışı
Bir vaxtlar “Portu”nu Çempionlar Liqasının qalibi edən Mourinyo bu dəfə azarkeşlərin fitləri və atılan əşyalarla qarşılanıb.
O, vəziyyəti soyuqqanlı şəkildə qarşılayıb:
“Əla, heç bir problem yoxdur.”
Heç-heçədən sonra “Portu” 22 xalla liderliyini qoruyub, “Sportinq” 19 xalla ikinci, “Benfika” isə 18 xalla üçüncü pillədə qərarlaşıb.
