Bu həftə Misli Premyer Liqasında XXX turun oyunları keçiriləcək. “Qəbələ” turun ilk oyun günündə meydana çıxacaq. Elmar Baxşıyevin baş məşqçisi olduğu komanda səfərdə “Neftçi” ilə qarşılaşacaq. 90plus.az klubun rəsmi saytına istinadən xəbər verir ki, "Bakcell Arena"da baş tutacaq matç rəqiblərin 64-cü dueli olacaq. Komandalar indiyədək 63 dəfə görüşüb. Hesabında 18 qələbə olan “Qəbələ” 17 heç-heçə edib və 28 dəfə məğlub olub. Rəqib qapısına 74 qol vuran futbolçularımız 91 top buraxıb. Bu oyun Premyer Liqa çərçivəsində 59-cu duel olacaq. Əvvəlki 58 matçda 17 qələbəsi olan komandamız 14 dəfə bir xalla kifayətlənib və 27 dəfə uduzub. Rəqib qapısına 67 dəfə yol tapan “qırmızı-qaralar” 86 top buraxıb.  “Neftçi” ilə səfərdə 32-ci dəfə görüşəcək “Qəbələ” rəqib meydanında 9 dəfə qalib gəlib, 8 heç-heçə edib və 14 dəfə uduzub. Komandamız səfərdə 36 qol vurub, 45-ni buraxıb. Xatırladaq ki, aprelin 14-də “Bakcell Arena”da keçiriləcək matç 20:00-da başlayacaq.