Rəşad Sadıqov: “Fantastik qola şahid olduq, bu səviyyə fərqi göstərdi” – finaldan sonra  analiz etdi.

90plus.az xəbər verir ki,  Rəşad Sadıqov Azərbaycan Kubokunun finalında "Zirə"nin "Sabah"a 2:1 hesabı ilə məğlub olmasından sonra oyunu şərh edib.

Baş məşqçi matçdan sonra keçirilən mətbuat konfransında komandasının çıxışını iki fərqli hissəyə bölərək belə danışıb:

“Oyun bizim üçün çox yaxşı başladı. Erkən qol vurduq və ilk 30–35 dəqiqədə etibarlı müdafiə olunduq. Amma birinci hissənin sonlarında rəqibə iki təhlükəli epizod verdik. O ana qədər isə bizim də ikinci qolu vurmaq şanslarımız var idi.”

Sadıqov ikinci hissədə planın müəyyən qədər işlədiyini, lakin oyunun gedişini dəyişən məqamın fərdi ustalıq olduğunu bildirib:

“İkinci hissədə taktiki dəyişikliklər etdik və daha etibarlı görünürdük. Rəqibə yüz faizlik epizod vermirdik. Amma məhz o dəqiqələrdə fantastik bir qol gördük. Hesab bərabərləşəndən sonra hücumda fəallaşdıq, amma əks-hücumda ikinci qolu buraxdıq.”

Məşqçi buraxılan qolların səviyyə fərqini göstərdiyini də vurğulayıb:

“Buraxdığımız qollar bir çox sualların cavabıdır. Yüksək fərdi ustalıqla vurulan qollar rəqibin keyfiyyətini göstərdi.”

Matçda erkən sarı vərəqə epizodu ilə bağlı sualı isə Sadıqov qısa cavablandırıb:

“Hakimlikdən danışmaq istəmirəm. Rəqibi qələbə münasibətilə təbrik edirəm.”

Final məğlubiyyətinə baxmayaraq, o, komandasının mövsüm boyu mübarizəsini yüksək qiymətləndirib:

“Üç finalda uduzmuşuq, amma hər birində kiçik detallar fərqli getsəydi, nəticə başqa ola bilərdi. Buna baxmayaraq 6 ildə 12 yarışdan 6-da mükafat uğrunda oynamışıq. Bu, qürurvericidir.”

Sadıqov həmçinin çempionluq mübarizəsinə də toxunaraq komandanın sona qədər yarışda qalacağını bildirib:

“Sona qədər mübarizə aparacağıq. Qarşıda çox ağır oyunlar var, amma sona qədər vuruşacağıq.”