"Düzdür, baxımlı futboldan söhbət gedə bilməz. Amma çalışırdıq ki səfərdən xal ilə qayıdaq, qalib gələk. Epizodlarımız da oldu. Qələbə də qazana bilərdik, uduza da. Komanda mübarizə apardı. "Şamaxı"da oynamaq çətindir. Burada liderlər də çətinlik çəkiblər". 90plus.az xəbər verir ki, bu sözləri "Kəpəz"in baş məşqçisi Tərlan Əhmədov Misli Premyer Liqasının 31-ci turunda səfərdə "Şamaxı" ilə 1:1 hesablı heç-heçə etdikləri oyundan sonra keçirilən mətbuat konfransında deyib. O bildirib ki, bəlkə də birinci hissədə yaratdıqları qol epizodlarından istifadə etsəydilər, nəticə fərqli olardı: "Bu bir xal bizim üçün elitada qalmaq baxımdan önəmlidir. Kollektiv yorğunluq fonunda oynayır. Biz səfərlərdə oynayırıq. Yol yorğunluğu özünü göstərir. Bu, təbii prosesdir. Qarşıdakı beş oyuna futbolçuları psixoloji cəhətdən hazırlamalıyıq. Evdə oynamamağın təsiri var. Gəncədə daha istəkli, aqressiv, qalibiyyət ruhu olan komanda kimi çıxış edirdik. Bir xala görə futbolçulara təşəkkür edirəm. İşimizi daha rahat davam etdirəcəyik. Qazandığımız xal və ya xallar bizə Premyer Liqada qalmağa və çempionatda altıncı yer tutmağa kömək edəcək".