Lukas Torreira milli komandaya çağrılmamasına görə Marselo Bielsa ilə mübahisəyə dair açıqlama verdi.

90plus.az xəbər verir ki, “Qalatasaray”ın yarımmüdafiəçisi Lucas Torreira Uruqvay milli komandası üçün çağrılmayınca etirazını bildirib. Təcrübəli futbolçu ölkəsinin mətbuatına açıqlamasında deyib: “Ölkəmizin futbolçuları milli komandaya getmək istəklərini itirməməlidir. Biz daha çoxunu haqq edirik.” Bu sözlər Uruqvay futbol ictimaiyyətində geniş müzakirə yaradıb.

Bielsa Torreiranın etirazına cavab verdi

Uruqvay millisinin baş məşqçisi Marselo Bielsa təşkil olunan mətbuat konfransında Torreiraya cavab verib:

• “Torreira üçün hər zaman əlimdən gələni etdim, heç vaxt onun oyunlarını izləməyi dayandırmadım. ‘Qalatasaray’dakı məhsuldarlığını görürsünüz. O, çox təsirli və vacib oyunçudur. Avropanın elit komandalarından birində oynayır.”

• “Bir gün mənə zəng etdi və ‘Niyə məni heyətə çağırmırsınız?’ dedi. Mən ona dedim ki, ‘Sənin heyətə çağırılma haqqın var, beləliklə səni yaxından görüb dəyərləndirə bilərəm.’ O gəldi, bizimlə oldu. Onunla eyni mühiti paylaşdıq və futbol anlayışımı ona göstərdim. Sonra onu bir daha çağırmadım.”

• “Torreira; Valverde və Bentankurun oynadığı mövqedə çıxış edir. Əgər bu mövqe artıq doludursa və Torreiranın ora daxil olmaq şansı yoxdursa, onu çağırmağım lazım deyil.”

• “Əlbəttə, Torreira mənim seçimimlə razı deyil və bunu dolayı yolla bildirir. Mən ona ən yaxşı şəkildə yanaşdım və bir futbolçu olaraq hörmət edirəm.”

Torreiradan Tabarezə təşəkkür mesajı

Bielsanın açıqlamalarından sonra Torreira keçmiş baş məşqçi Oskar Tabarezə sosial mediada təşəkkürünü bildirib:

“Ölkəmizə həsr etdiyiniz illər ərzində göstərdiyiniz fədakarlıq və ehtiras üçün ən səmimi təşəkkürümü bildirirəm. Sizin bağlılığınız və liderliyiniz milli komandamızın uğurunda vacib rol oynayıb və mən sizin komandanızın bir üzvü olduğum üçün özümü xüsusi hiss edirəm. Mənə inanıb, yalnız futbolçu deyil, insan kimi də böyüməyimə kömək etdiyiniz üçün təşəkkür edirəm. Sizin bilik, səbir və dəstəyiniz mənim üçün əvəzsiz idi və sizinlə işləmək fürsəti tapdığım üçün həmişə minnətdar olacağam.”