“Real Madrid”in sabiq yarımmüdafiəçisi Toni Kroos bildirib ki, “Barselona”nın hazırkı taktiki yanaşması onların UEFA Çempionlar Liqasında uğur qazanmasına həmişə mane olacaq.

90plus.az xəbər verir ki, Kataloniya təmsilçisi turnirin 1/4 final mərhələsində “Atletiko Madrid”ə iki oyunun nəticəsinə görə 2:3 hesabı ilə uduzaraq mübarizəni dayandırıb.

Kroos deyib:
“Düşünürəm ki, ‘Barselona’ daha güclü tərəf idi, amma uzun müddət say azlığında oynayanda bu, çox çətin olur. ‘Atletiko’ nəticəni qorumağı yaxşı bacarır və ilk oyundakı üstünlük, üstəlik rəqibin qırmızı vərəqə alması onların yarımfinala çıxması üçün böyük üstünlük yaratdı.

Belə müdafiə olunanda və arxada bu qədər boşluq buraxanda, qapıçı ilə təkbətək epizodların qarşısını almaq üçün qırmızı vərəqələr kimi hallar baş verir.”

O, sözlərinə davam edib:
“‘Barselona’nın müdafiəsi çox zəifdir. Keçən il bu, onlara qarşı ‘İnter’lə matçlarda problem yaratdı, bu il isə ‘Atletiko’ya qarşı. Daha əvvəl də demişəm, əgər oyun üslublarını dəyişməsələr, Çempionlar Liqasını qazana bilməyəcəklər”, – deyə Kroos “Luppen TV” YouTube kanalına açıqlamasında bildirib.