"Real Madrid"də son günlər yaşanan daxili gərginlik İspaniya mətbuatının əsas gündəm mövzularından birinə çevrilib. Komandanın baş məşqçisi Alvaro Arbeloa futbolçular Federiko Valverde və Orelyen Tçuameni arasında baş verən insidentə münasibət bildirib.

90plus.az xəbər verir ki, məşq zamanı yaşanan qalmaqal nəticəsində Valverde zədələnib. İddialara görə, uruqvaylı yarımmüdafiəçi komanda yoldaşına qarşı sərt davranıb və hətta onu zədələməyə çalışıb. Klub daxilində isə futbolçuların böyük hissəsinin Çuamenini müdafiə etdiyi bildirilir. Mənbələrin məlumatına əsasən, soyunub-geyinmə otağında Valverdenin davranışının “həddi aşdığı” düşünülür.

Baş məşqçi Arbeloa məsələyə münasibətində məsuliyyəti öz üzərinə götürüb:

“Meydanda və ya klub daxilində baş verən hər şeyə görə məsuliyyət mənim üzərimdədir. Kimisə günahlandırmaq istəyirsinizsə, məni günahlandırın”.

İspaniyalı mütəxəssis insidentin mediaya sızmasından narahat olduğunu gizlətməyib:

“Məni ən çox üzən odur ki, soyunub-geyinmə otağında baş verənlər orada qalmalıdır. Bunlar “Real Madrid”ə yaraşan hadisələr deyil. Amma futbolun daxilində belə hallar olur və mən daha ağır hadisələr də görmüşəm”.

Arbeloa hadisənin böyüdülməməsinin tərəfdarı olduğunu bildirib. Onun sözlərinə görə, yaşananlar müəyyən qədər bədbəxt təsadüf nəticəsində daha ciddi görünməyə başlayıb:

“Baş verən hadisə uğursuz insident idi. Federikonun aldığı zədə müəyyən qədər bəxtsizliklə bağlı idi. Klub məsələni daxildə həll edib, futbolçular da məsuliyyəti qəbul ediblər”.

Baş məşqçi komandada müəyyən futbolçuların heyət seçiminə təsir göstərməsi ilə bağlı iddiaları da təkzib edib. Arbeloa yalnız idman prinsiplərinə əsasən qərar verdiyini söyləyib:

“Mən yalnız layiq olduğunu düşündüyüm futbolçuları meydana buraxıram. Son vaxtlar çoxlu yalan xəbərlər yayılıb. Hansısa futbolçunun mənimlə problem yaşadığı üçün oynamadığı barədə deyilənlərin hamısı yalandır”.

Təcrübəli çalışdırıcı komandanın çətin dövrdən keçdiyini etiraf edib. Onun fikrincə, titulsuz keçən mövsümlər futbolçular üzərində həm psixoloji, həm də emosional təzyiq yaradıb:

“Bu komandada oynayan futbolçular çox ambisiyalıdır. İki mövsüm kuboksuz qalmaq onlar üçün ağırdır. Amma mən sağlam soyunub-geyinmə otağı görürəm. Bu kollektiv yenidən qələbə qazanmağa hazırdır”.

Arbeloa heyətin əvvəlki illərlə müqayisədə daha gənc olduğunu və bunun təcrübə baxımından müəyyən problemlər yaratdığını da vurğulayıb:

“Bu soyunub-geyinmə otağı mənim futbolçu olduğum dövrdəkindən daha cavandır. Amma bu təcrübə onları daha güclü edəcək. Onlar “Real Madrid” formasının nə qədər böyük məsuliyyət olduğunu daha yaxşı anlayacaqlar”.

Baş məşqçi futbolçularını açıq şəkildə müdafiə edərək onların peşəkarlığına şübhə ilə yanaşılmasının düzgün olmadığını deyib:

“Futbolçular səhvlərini etiraf edib, üzr istəyiblər və bu mənim üçün kifayətdir. Mən öz oyunçularımı ictimai şəkildə hədəfə çevirməyəcəyəm. Onlar bu klub üçün çox şey ediblər”.

Arbeloa klub əfsanəsi Xuanitonu nümunə göstərərək futbolçuların da insan olduğunu xatırladıb:

“Madridistalar Xuanitonu çox sevirdi. O da səhvlər edirdi, amma bu, onun klub üçün etdiklərini unutdurmurdu”.

Sonda “Real Madrid”in çalışdırıcısı komandasına inandığını bir daha vurğulayıb:

“Bu dörd ay ərzində mənə soyunub-geyinmə otağından narazı qalmağa əsas verəcək heç nə olmayıb. Mən futbolçularımla fəxr edirəm və onların yenidən uğur qazanacağına inanıram”.