DÇ-2026: Avropa zonasında qrup mərhələsi başa çatdı — liderlər və pley-offçular tam müəyyənləşdi.
90plus.az xəbər verir ki, bu gün DÇ-2026-nın Avropa üzrə seçmə mərhələsində qrup oyunlarına yekun vuruldu. Beş qrupda ümumilikdə 10 qarşılaşma keçirildi və mundiala birbaşa vəsiqə qazananlarla pley-offa gedəcək komandalar bəlli oldu.
E qrupu: İspaniya lider, Türkiyə pley-offda
Madriddə baş tutan İspaniya – Türkiyə oyunu gərgin mübarizə ilə yadda qalıb və 2:2 hesabı ilə yekunlaşıb.
16 xal toplayan İspaniya qrupun qalibi kimi DÇ-2026-ya birbaşa vəsiqə əldə edib.
Türkiyə isə 13 xalla ikinci yeri tutaraq pley-off mərhələsinə yollanır.
C qrupu: Şotlandiyadan möhtəşəm dönüş
Şotlandiya – Danimarka dueli seçmə mərhələnin ən dramatik oyunlarından biri olub. Əsas vaxt 2:2 hesabı ilə bitsə də, şotlandlar 90+3 və 90+9-da vurduqları qollarla 4:2 hesablı qələbə qazanıblar.
Beləliklə, Şotlandiya 13 xalla qrup lideri kimi mundiala yüksəlib.
Danimarka 11 xalla ikinci olub və pley-offa adlayıb.
B qrupu: İsveçrə zirvədə
Hər iki matçın 1:1 hesabı ilə bitdiyi B qrupunda lider dəyişməyib.
14 xal toplayan İsveçrə birinci yeri tutub və DÇ-2026 üçün vəsiqə qazanıb.
Kosovo 11 xalla ikinci yerdə qərarlaşıb və pley-off mərhələsində oynayacaq.
H qrupu: Avstriya mundiala gedir
Avstriya – Bosniya və Herseqovina qarşılaşması 1:1 hesabı ilə yekunlaşıb.
Rumıniya isə San Marinonu 7:1 hesabı ilə darmadağın edib.
Nəticədə, Avstriya 19 xalla qrup lideri olaraq dünya çempionatına yollanır.
Bosniya və Herseqovina isə 17 xalla pley-off hüququ qazanıb.
J qrupu: Belçika və Uels meydanı dağıtdı
J qrupunda iki böyük hesab qeydə alınıb:
Belçika Lixtenşteyni 7:0, Uels isə Şimali Makedoniyanı 7:1 üstələyib.
Belçika 18 xalla birbaşa mundial bileti qazanıb.
Uels isə 16 xalla ikinci olub və pley-off mərhələsinə vəsiqə alıb.
Günün nəticələri
B qrupu
İsveç – Sloveniya – 1:1
Kosovo – İsveçrə – 1:1
C qrupu
Belarus – Yunanıstan – 0:0
Şotlandiya – Danimarka – 4:2
E qrupu
İspaniya – Türkiyə – 2:2
Bolqarıstan – Gürcüstan – 2:1
H qrupu
Avstriya – Bosniya və Herseqovina – 1:1
Rumıniya – San Marino – 7:1
J qrupu
Belçika – Lixtenşteyn – 7:0
Uels – Şimali Makedoniya – 7:1
ℹ️ DÇ-2026-nın Avropa zonasındakı pley-off cütlükləri qarşıdakı günlərdə müəyyənləşəcək.
39 vəsiqənin sahibi: Meydan sahibləri – ABŞ, Kanada və Meksika ilə yanaşı, Yaponiya, Yeni Zelandiya, İran, Argentina, Özbəkistan, Cənubi Koreya, İordaniya, Avstraliya, Braziliya, Ekvador, Uruqvay, Kolumbiya, Paraqvay, Mərakeş, Tunis, Misir, Əlcəzair, Qana, Kabo-Verde, Cənubi Afrika, Qətər, Səudiyyə Ərəbistanı, İngiltərə, Seneqal, Kot-d'İvuar, Fransa, Xorvatiya, Norveç, Portuqaliya, Almaniya, Niderland, İsveçrə, İspaniya, Şotlandiya, Avstriya və Belçika.
ℹ️ 2026-cı il iyunun 11-dən iyulun 19-dək keçiriləcək dünya çempionatına ümumilikdə 48 komanda qatılacaq.
