Luis Suares milliyə qayıda bilər: “Dünya Çempionatı üçün heç vaxt yox demərəm”.
90plus.az xəbər verir ki, Luis Suares Uruqvay millisinə mümkün qayıdışı ilə bağlı diqqətçəkən açıqlama verib.
2024-cü ildə milli karyerasını başa vuran təcrübəli hücumçu bildirib ki, əgər komanda ona ehtiyac duysa, Dünya Çempionatı üçün geri dönməyə hazırdır.
Suares həmin dövrdə verdiyi bəzi açıqlamalara görə peşman olduğunu da etiraf edib:
“O vaxt gənc nəslə yol vermək üçün kənara çəkildim. Deməməli olduğum bir şeyi dedim. Lazım olan insanlardan artıq üzr istəmişəm”.
39 yaşlı forvard milli komandaya heç vaxt “yox” deməyəcəyini vurğulayıb:
“Əgər milli komanda mənə ehtiyac duysa, xüsusilə Dünya Çempionatı ərəfəsində, heç vaxt imtina etmərəm”.
Qeyd: Suares milli karyerasını 2024-cü ilin sentyabrında başa vurmuşdu. O, Uruqvay tarixinin ən məhsuldar futbolçusu kimi 143 oyunda 69 qola imza atıb.
Veteran hücumçunun millidən ayrılığı qalmaqalsız ötüşməmişdi. Suares baş məşqçi Marselo Bielsanın idarəçilik tərzini tənqid etmiş və bunun paltardəyişmə otağında problemlər yaratdığını söyləmişdi. Lakin futbolçu indi həmin açıqlamalara görə üzr istədiyini bildirib.
Hazırda "İnter Mayami" klubunda çıxış edən Suares hələ də futbol oynamaq həvəsinin qaldığını deyib:
“İnsan hiss edir ki, daxilində hələ bir az futbol həyatı qalıb. Məğlubiyyətlərə əsəbiləşirsənsə, qol vuranda sevinirsənsə, deməli hələ də rəqabət aparmaq istəyirsən”.
Suares karyerası ərzində 4 Dünya Çempionatında iştirak edib və 2011-ci ildə Uruqvayla Amerika Kubokunu qazanıb.
Xatırlatma: 2026 Dünya Çempionatı ABŞ, Kanada və Meksikanın birgə ev sahibliyi ilə iyunun 11-də start götürəcək.
