“Zirə”nin baş məşqçisi Rəşad Sadıqov Azərbaycan Kubokunun finalı öncəsi komandasının ağır qrafikdən keçdiyini və bu yükə baxmayaraq, mövsümün ən yaxşı oyunlarından birini göstərmək istədiklərini bildirib.
90plus.az xəbər verir ki, təcrübəli mütəxəssis rəqib "Sabah" barədə danışarkən komandanın keyfiyyətli futbol oynadığını, güclü heyətə və yüksək səviyyəli məşqçiyə sahib olduğunu qeyd edib.
“Sabah 40 gün tamam olacaq ki, artıq 9-cu oyunumuza çıxırıq. Bunların hər biri bizim üçün çox ağır keçib”.
“Təbii ki, komandada yorğunluq və gərginlik var. Amma buna baxmayaraq mövsümün ən yaxşı oyunlarından birini keçirmək əzmindəyik”.
“Qarşımızda “Sabah” kimi ciddi, baxımlı futbol oynayan, yüksək səviyyəli məşqçi və futbolçu heyətinə malik rəqib var”.
Təcrübəli mütəxəssis finaldakı psixoloji məqama da toxunub:
“Bəlkə də sabahkı final bizim üçün son şansdır. Bizim itirəcəyimiz şeylər daha çoxdur, rəqib isə onsuz da çempiondur”.
Valdas Dambrauskas barədə danışan Sadıqov rəqib həmkarına hörmətini gizlətməyib:
“Məndə ona qarşı heç bir xüsusi aqressiya yoxdur, əksinə, ona böyük hörmətim var”.
“Hətta sevinirəm ki, bizim çempionatımızda belə keyfiyyətli məşqçi çalışır”.
“Ümid edirəm ki, nə vaxtsa biz tam eyni şərtlərlə və imkanlarla qarşılaşarıq”.
Baş məşqçi sıx qrafik və ağır meydançalardan da şikayətlənib:
“May ayında palçıqlı və sulu meydançada oynamaq futbolçularda çox ciddi əlavə yorğunluq yaradır”.
“Meydançanın durumunu görüb düşünürdüm ki, burada 90 dəqiqə oynayan istənilən futbolçu hər an ağır zədə ala bilər”.
Sadıqov heyətlə bağlı problemləri də açıqlayıb:
“Görünən odur ki, Hacıağa çox böyük ehtimalla matçı buraxacaq”.
“Enrike Kustodionun yoxluğu da mənim üçün əlavə və çox ciddi problem yaratdı”.
Sonda isə “Zirə” çalışdırıcısı komandasına təşəkkür etməyi də unutmayıb:
“Mən öz futbolçularımla hər zaman yalnız qürur duymuşam”.
“Sabahkı nəticədən asılı olmayaraq, futbolçularıma dərin minnətdarlığımı bildirirəm”.
