FIFA-dan yeni qayda: ölkə liqaları mövsümdə 1 oyunu xaricdə keçirə biləcək.
90plus.az xəbər verir ki, FIFA futbol dünyasında ciddi dəyişiklik edə biləcək yeni qayda üzərində işləyir. “The Guardian”ın məlumatına görə, qurum liqalara mövsüm ərzində bir oyunu ölkə xaricində keçirməyə icazə verməyə hazırlaşır.
Yeni protokola əsasən, hər liqa yalnız bir yüksək liqa matçını başqa ölkədə təşkil edə biləcək. Bu addım futbolun qlobal auditoriyasını genişləndirmək məqsədi daşıyır.
Keçmiş cəhdlər baş tutmamışdı
Ötən il bu tip planlar artıq gündəmə gəlmişdi. “Barselona” ilə “Vilyarreal”ın ABŞ-ın Mayami şəhərində, “Milan” ilə “Komo”nun isə Avstraliyanın Pert şəhərində qarşılaşması nəzərdə tutulurdu. Lakin həmin layihələr son anda həyata keçirilməmişdi.
Razılıq prosesi mürəkkəb olacaq
Yeni qaydaya əsasən, belə oyunların keçirilməsi üçün bir neçə qurumun razılığı tələb olunacaq:
- Klubların milli assosiasiyası
- Həmin assosiasiyanın daxil olduğu konfederasiya
- Oyunun keçiriləcəyi ölkənin futbol qurumu
- Həmin ölkənin konfederasiyası
- Və sonda FIFA-nın təsdiqi
Növbəti mövsüm üçün plan
FIFA bu protokolu artıq növbəti mövsümə qədər hazır vəziyyətə gətirməyi hədəfləyir. Məsələ yaxın vaxtlarda təşkilatın işçi qrupunun iclasında müzakirə olunacaq.
Bu dəyişiklik reallaşarsa, futbol azarkeşləri gələcəkdə Avropa nəhənglərinin liqa oyunlarını fərqli qitələrdə canlı izləmək imkanı əldə edə bilər.
