Misli Premyer Liqasının 31-ci turunda “Qarabağ”la 1:1 hesablı heç-heçə edən “Qəbələ”nin baş məşqçisi Kaxaber Sxadadze komandasının çıxışından razı qaldığını bildirib.

90plus.az xəbər verir ki, gürcüstanlı mütəxəssis qarşılaşmadan sonra futbolçularının meydanda böyük əzmkarlıq nümayiş etdirdiyini vurğulayıb. O, əldə olunan bir xalın komanda üçün xüsusi əhəmiyyət daşıdığını qeyd edib:

“Futbolçularıma təşəkkür edirəm. Bizim üçün turnir cədvəli baxımdan olduqca vacib bir matç idi və oyunçular bu məsuliyyəti tam dərk edirdilər. Vacib bir xal qazandıq”.

Sxadadze rəqibin gücünü də xüsusi qeyd edib. Baş məşqçinin sözlərinə görə, “Qarabağ” meydana optimal heyətlə çıxmışdı və komandanın uğurları Azərbaycan futbolunun inkişafında mühüm rol oynayır:

“Onlar Çempionlar Liqasında möhtəşəm nəticələr göstəriblər. Bütün bunlar Qurban Qurbanovun uzunmüddətli əməyinin bəhrəsidir. Azərbaycan futbolu məhz onun sayəsində Avropada və dünyada tanınır”.

Mütəxəssis matç ərzində komandası tərəfindən yaradılan qol imkanlarına da toxunub. O, xüsusilə qapıçı Səlahət Ağayevin penalti epizodundakı çıxışını ön plana çəkib:

“Səlahət Ağayevi xüsusi qeyd etmək istəyirəm, o, penalti epizodunda komandanı real qoldan xilas etdi”.

Baş məşqçi qarşıdakı iki turun komanda üçün həlledici olacağını bildirib:

“Qarşıda daha iki oyunumuz var. Hər ikisi finala bərabər matçlardır. Tez bərpa olunmalı və növbəti oyuna hazırlaşmalıyıq”.

Sxadadze qış fasiləsindən sonrakı çıxışları da dəyərləndirib. O, bəzi nəticələrdən narazı qalsa da, komandanın son matçlarda xarakter göstərdiyini deyib:

“Qış fasiləsindən sonra bərbad oynadığımız matç olmayıb. Amma son oyunların hamısında komanda xarakter göstərməyi bacarıb”.

Təcrübəli mütəxəssis turnir cədvəlindəki vəziyyət və mümkün pley-off ehtimalı ilə bağlı suala isə qısa cavab verib:

“Hazırda yalnız növbəti oyunu düşünürük. Bizim üçün ən vacib olan məhz qarşıdakı matçdır”.