Hindistanlı futbolçudan sərt çağırış: “Messiyə milyonlar xərcləməkdənsə, öz futbolumuza yatırım edin”!
90plus.az xəbər verir ki, Lionel Messinin Hindistana etdiyi GOAT turu ölkədə böyük səs-küy yaratdı. Milyonlarla azarkeş futbol tarixinin ən böyük simalarından birini canlı izləmək fürsəti qazandı, sponsorlar və təşkilatçılar isə ciddi maliyyə qazancı əldə etdi. Ancaq bu parlaq görüntülərin arxasında Hindistan futbolunun acı reallığı yenidən gündəmə gəldi.
Hindistan millisinin aparıcı futbolçularından Sandeş Cinqan Messinin səfərindən sonra açıq və sərt mövqe ortaya qoydu. O, ölkə futbolunun ağır vəziyyətdə olduğunu xatırladaraq, prioritetlərin tamamilə yanlış qurulduğunu bildirdi.
Məsələ ondadır ki, Hindistan Super Liqası (ISL) maliyyə böhranı yaşayır və dağılmaq təhlükəsi ilə üz-üzədir. Məlumatlara görə, Hindistan Futbol Federasiyasının (AIFF) liqanı ayaqda saxlamaq üçün cəmi 420 min dollar vəsaitə ehtiyacı var. Buna baxmayaraq, Messinin GOAT turuna ölkə büdcəsindən təxminən 1,2 milyon dollar xərclənib.
Cinqan məhz bu ziddiyyəti qabardaraq açıq mesaj verib: Hindistanda futbolun gələcəyi üçün şou xarakterli səfərlərə yox, yerli liqaya, akademiyalara və infrastruktura yatırım edilməlidir. Onun fikrincə, bir neçə günlük ulduz səfəri ölkə futbolunu xilas etmir, amma həmin vəsait düzgün yönəldilsə, minlərlə gənc futbolçu üçün real imkan yaradıla bilər.
Hindistan futbolu alqışa yox, sistemli inkişaf modelinə ehtiyac duyur.
Messinin GOAT turu yaddaşlarda qalacaq. Amma bu turdan sonra Hindistan futbolu üçün əsas sual dəyişməz qalır: ölkə futbolunu ayaqda saxlayacaq real addımlar nə vaxt atılacaq?
Həmçinin Bax: https://www.instagram.com/p/DSYQz5LgLnO/?igsh=MTFkNjI2ZGNqdDV1aQ==
