Eduardo Kamavinqa Anqolada məktəb və futbol akademiyası açdı.

90plus.az xəbər verir ki,  “Real Madrid”in və Fransa millisinin yarımmüdafiəçisi Eduardo Kamavinqa Anqolada sosial layihəyə imza atıb. Futbolçu doğulduğu ölkədə gənclər üçün məktəb və futbol akademiyası yaradıb.

Milad tətilindən yararlanan Kamavinqa həyatının ilk aylarını keçirdiyi Anqolaya səfər edib. 23 yaşlı yarımmüdafiəçi Luandada valideynləri ilə birlikdə Gənclər və İdman Nazirliyinin nümayəndələri ilə görüşərək futbol akademiyası və məktəbin yaradılmasını nəzərdə tutan layihənin son detallarını razılaşdırıb. Layihə dövlət katibi Paulo Madeyranın dəstəyini alıb.

Kamavinqa təşəbbüsü ilə bağlı bunları deyib:

“Burada gənclər üçün futbol akademiyası və məktəb yaratmağı seçdim ki, ölkəmin mənə verdiklərini geri qaytara bilim. Bu, məni böyük sevinc hissi ilə doldurur. Valideynlərim mənimlə qürur duyurlar. Yenidən ölkəmə qayıtmaqdan və onun inkişafına töhfə vermək imkanından çox xoşbəxtəm.”

Qeyd: Kamavinqa Fransada böyüsə də, Anqolada doğulub və bu layihə futbolçunun doğma ölkəsinə ilk böyük sosial töhfələrindən biri hesab olunur.