"Türkiyədə olmaq çox qürurverici, gözəl hisslər, öz adıma yaxşı bir sınaq idi".  90plus.az-ın "Anadolu bugün" nəşrinə istinadən yaydığı xəbərə görə, bu sözləri Azərbaycan millisinin hücumçusu Mahir Emreli bildirib. 2023-cü ilin əvvəlindən icarə qaydasında "Konyaspor"da çıxış edən M.Emreli bu komandan ayrılıb. O, dünən mövsümün son matçında Türkiyə superliqasında "Beşiktaş"la oyunda (3:3) iştirak edib və bir qol vurub. Bu, onun sözügedən liqada 2-ci qolu olub. Emreli bundan sonra müqavilə ilə məxsus olduğu Zaqreb "Dinamo"suna qayıtmalıdır. O bildirib ki, Türkiyədə mədəniyyət və dil baxımından sıxıntı yaşamayıb: "Adaptasiya problemi olmadı. Çətin bir dönəmdə komandaya gəldim. O ərəfədə böyük bir zəlzələ fəlakəti yaşandı. Futbol olaraq sadəcə ilk dönəmdə adaptasiya problemim oldu. Bunu statistikada da görə bilərsiniz". M.Emreli bu mövsümkü çıxışı ilə bağlı da danışıb: "Matçların bəlkə də çoxunu pis keçirmədim. Amma statistika baxımdan üzücü bir mövsüm oldu - həm "Dinamo" Zaqreb, həm də "Konyaspor"da. Bu, psixoloji baxımdan da çətindir. İnşallah, belə bir mövsüm mənim üçün sonuncu olar. Çox şükür ki, komanda olaraq yaxşı bir mövsüm oldu. Məni ayağa qaldıran atmosfer idi. Bu cür atmosferdə futbolçular daha çox oynamaq istəyir".