Ayyub Buaddi milli komanda seçimini edib və Fransada yox, Mərakeş millisində çıxış etmək qərarı verib.
90plus.az xəbər verir ki, “Lill”in gənc yarımmüdafiəçisi uzun müddətdir Fransa və Mərakeş arasında seçim qarşısında idi. Fransa millisinin baş məşqçisi Didye Deşam tərəfindən açıqlanan son siyahıda yer almayan futbolçunun yekun qərarını Mərakeşdən yana verdiyi təsdiqlənib.
Məlumata görə, bu qərar artıq Mərakeş Kral Futbol Federasiyası tərəfindən də rəsmiləşdirilib və Buaddi 2026-cı il dünya çempionatı üçün “Atlas şirləri”nin heyətində yer almağa hazırlaşır.
“Lill” akademiyasının yetirməsi sayılan Buaddi Avropanın ən perspektivli yarımmüdafiəçilərindən biri hesab olunur. O, yaşıdları arasında Lamin Yamal və Pau Kubarsi kimi futbolçularla birlikdə ən parlaq istedadlardan biri kimi göstərilir.
Artıq peşəkar səviyyədə 100-ə yaxın oyunda iştirak edən gənc futbolçu texniki keyfiyyətləri və universal oyun tərzi ilə seçilir. Onun Mərakeş millisinin heyətinə qısa zamanda uyğunlaşacağı gözlənilir.
Qeyd: Mərakeş son illərdə ikili vətəndaşlığı olan bir sıra yüksək səviyyəli futbolçuları öz millisinə cəlb etməklə heyətini daha da gücləndirir və 2026-cı il dünya çempionatı ilə yanaşı, ölkənin şərikli ev sahibliyi edəcəyi 2030 mundialına böyük hədəflərlə hazırlaşır.
