Memfis Depay Niderland millisinin tarixində ən çox qol vuran futbolçu adını qazanıb.

90plus.az xəbər verir ki, hazırda Braziliyanın "Korintians" klubunda çıxış edən 31 yaşlı hücumçu, DÇ-2026-nın seçmə mərhələsində Litvaya qarşı keçirilən oyunda iki dəfə fərqlənib.

Depay bu qollarla yığma karyerasında vurduğu qolların sayını 52-yə çatdırıb. O, bu göstəriciyə 104 oyunda nail olub və 102 matçda 50 qol vuran Robin van Persini geridə qoyaraq Niderland futbol tarixinin ən məhsuldar oyunçusu olub.

Qeyd: Memfis Depay karyerası ərzində “Atletiko Madrid”, “Barselona”, “Lion”, “Mançester Yunayted” və “PSV” kimi klublarda da çıxış edib.