Fransanın “Nitsa” klubunun azarkeşləri komanda avtobusunu mühasirəyə alaraq futbolçulara fiziki hücum ediblər.
90plus.az xəbər verir ki, Liqa 1-in 14-cü turunda “Loryan”a 1:3 hesabı ilə uduzaraq ardıcıl 6-cı məğlubiyyətini yaşayan “Nitsa”da gərginlik pik həddə çatıb. Ötən gecə komanda məşq bazasına qayıdarkən təxminən 400 hiddətli azarkeş avtobusu qarşılayıb, giriş yolunu bağlayaraq futbolçularla üz-üzə gəlib.
Hadisə zamanı bir neçə oyunçunun fiziki hücuma məruz qaldığı bildirilir. Mənbələr komandanın tam təhlükə şəraitində qaldığını və futbolçuların şok yaşadığını vurğulayıb.
Narazılığın əsas hədəfində hücumçular Jeremi Boqa və Terem Moffi, eləcə də idman direktoru Florian Morris olub. Boqa bu ayın əvvəlində “Marsel” azarkeşlərini dəvət etməsi səbəbindən hələ də azarkeş qəzəbinin mərkəzindədir.
Məğlubiyyət “Nitsa”nı Liqa 1-də 10-cu sıraya endirib və komanda Avropa Liqasındakı qrupunda beş matçdan sonra sıfır xalla sonuncu yerdədir. Baş məşqçi Frank Ez artıq klubun real şəkildə aşağı liqaya düşməmə uğrunda mübarizə apardığını etiraf edib.
Prezident Ezin istefasını istisna edib, qış transfer pəncərəsinin komandaya müəyyən dinamika verə biləcəyini, lakin “bütün problemlərin həlli olmadığını” bildirib. İdman direktoru Morris isə hazırkı heyətin “ümumiyyətlə birləşmiş komanda görüntüsü vermədiyini” qəbul edib.
