Günün oyunu: Klubların Dünya Çempionatında ilk yarımfinal – “Fluminense” ilə “Çelsi” üz-üzə!

90plus.az xəbər verir ki, Klubların Dünya Çempionatında ilk yarımfinal qarşılaşması bu gecə keçiriləcək. Braziliya nəhəngi “Fluminense” ilə İngiltərə təmsilçisi “Çelsi” Nyu-York yaxınlığındakı MetLife Stadiumda final üçün döyüşəcək.

Qarşılaşma saat 23:00-da başlayacaq və TRT 1, DAZN, Okko Sport, Digiturk Play Turkey və tabii Turkey televiziya vasitəsilə canlı yayımlanacaq.

“Çelsi” tarixi yenidən yazmaq istəyir – London klubu turniri ikinci dəfə qazanaraq Klubların Dünya Çempionatını iki dəfə qazanmış ilk komanda olmağa çalışır. Lakin qarşıda dayanan “Fluminense” asan rəqib deyil: Rio-de-Janeyro təmsilçisi turnirdə məğlubiyyət üzü görməyib.

📌 “Çelsi”nin yarımfinala yolu:

• Qrup mərhələsi: “Los Anceles” üzərində 2:1 hesablı qələbə, “Flamenqo”ya 1:3 hesablı məğlubiyyət, “Esperans de Tunis” üzərində 3:0 hesablı qələbə.
• 1/8 final: “Benfika”ya qarşı əlavə vaxtda 4:1 hesablı qələbə.
• 1/4 final: “Palmeyras” üzərində 2:1 hesablı qələbə.

📌 “Fluminense”nin yarımfinala yolu:

• Qrup mərhələsi: Dortmundla 0:0, “Ulsan HD” üzərində 4:2, “Mamelodi Sandauns”la 0:0.
• 1/8 final: “İnter” üzərində 2:0.
• 1/4 final: “Əl-Hilal”ı 2:1 hesabı ilə məğlub edərək növbəti mərhələyə yüksəliblər.

Xüsusi diqqət: “Fluminense”nin kapitanı Tiaqo Silva bu oyunda köhnə klubuna qarşı meydana çıxacaq. 40 yaşlı müdafiəçi 2020-2024-cü illərdə “Çelsi”nin formasını geyinib, klubla UEFA Çempionlar Liqası, UEFA Superkuboku və Klubların Dünya Çempionatını qazanıb. Silva bu gecə start heyətində yer alacaq.

Qeyd: Bu, “Fluminense” ilə “Çelsi”nin rəsmi turnirlərdə ilk qarşılaşması olacaq. “Çelsi” Klubların Dünya Çempionatını daha əvvəl 2021-ci ildə Birləşmiş Ərəb Əmirliklərində keçirilən turnirdə qazanıb. Həmin finalda “Palmeyras” 2:1 hesabı ilə məğlub edilmişdi.