Dünya çempionatının Avropa seçmə mərhələsinin G qrupunda Niderland yığması səfərdə Finlandiya üzərində 2:0 hesablı qələbə qazanaraq uğurlu start götürüb.

90plus.az xəbər verir ki, Helsinki Olimpiya Stadionunda keçirilən qarşılaşmada “narıncılar” ilk hissədə vurduğu qollarla üstünlüyü ələ alaraq 3 xalı təmin edib.

Qonaq komandanın qollarını 6-cı dəqiqədə Memfis Depay və 23-cü dəqiqədə Denzel Damfris vurub. İkinci hissədə hesab dəyişməyib və Niderland üstünlüyünü qoruyaraq meydanı qalib tərk edib.

Bu nəticədən sonra Niderland G qrupunda xallarının sayını 3-ə çatdırıb. Finlandiya isə ilk məğlubiyyətini alaraq 4 xalda qalıb.