"Neftçi"nin təcrübəli futbolçusu Voyislav Stankoviç Sportal.az saytına açıqlama verib. Uzun illərdir ki, Azərbaycanda çıxış edən serbiyalı "Qarabağ" və "Qalatasaray" arasında xeyriyyə matçının keçirilməsinə münasibət bildirib. O, "Neftçi"nin də bu məqsədlə yoldaşlıq görüşü keçirməsini dəstəkləyəcəyini söyləyib: "Qarabağ" və "Qalatasaray" klublarının Türkiyədəki zəlzələdən əziyyət çəkən insanlara kömək üçün yoldaşlıq matçı keçirməsi əla ideyadır. Həqiqətən təqdirəlayiqdir. Azarkeşləri də oyuna səsləmək lazımdır. Hər halda, biletlər alaraq, həm oyuna baxarlar, həm də sonda yığılacaq pulla Türkiyədəki zəlzələdən əziyyət çəkənlərə kömək olardılar. Çünki evsiz-eşiksiz qalan insanlar var. Çox üzücüdür. Bu mənada, "Qarabağ" - "Qalatasaray" matçı əla ideyadır. "Neftçi"nin də kömək məqsədi ilə yoldaşlıq görüşü keçirməsi super ideya olar".