Boliviyada “Bluminq”–“Real Oruro” matçından sonra meydan döyüş meydanına çevrildi: 17 nəfər qırmızı vərəqə aldı.

90plus.az xəbər verir ki, Boliviya Kubokunun 1/4 final mərhələsində “Bluminq” ilə “Real Oruro” arasında baş tutan qarşılaşma sona çatar-çatmaz stadion meydanı sözün əsl mənasında savaş meydanına çevrilib. Oyun 2:2 hesabı ilə başa çatsa da, iki görüşün nəticəsinə görə üstün olan “Bluminq” yarımfinala vəsiqə qazanıb.

Hakim Renan Kastillonun final fiti ilə birlikdə hər iki komandanın futbolçuları və texniki heyəti arasında gərginlik kəskin şəkildə artıb. “Bluminq” komandasının yarımfinala yüksəlişini qeyd etməsi “Real Oruro” tərəfini qəzəbləndirib və meydanda böyük dava düşüb. Polis əməkdaşları vəziyyətə müdaxilə etmək məcburiyyətində qalıb.

Hadisələr zamanı ümumilikdə 17 nəfərin qırmızı vərəqə ilə cəzalandırıldığı açıqlanıb.

 Hakimin əlavə hesabatının gözləndiyi, Boliviya Futbol Federasiyasının İntizam Komitəsinin isə həm hakim qeydlərinə, həm də video görüntülərə əsasən əlavə cəzalar tətbiq edə biləcəyi bildirilib. Hadisələrə qarışan şəxslərin ciddi sanksiyalarla üzləşəcəyi ehtimal olunur.