“Paris Sen-Jermen” Klubların Dünya Çempionatının yarımfinalında “Real Madrid” üzərində 4:0 hesablı qələbə ilə əsl şou göstərib.
90plus.az xəbər verir ki, oyunun əvvəlindən etibarən meydanda tamamilə PSJ üstün idi. Tibo Kurtua ilk dəqiqələrdə iki vacib seyv etsə də, Raul Asensio və Antonio Rüdigerin ardıcıl kobud səhvlərinə heç nə edə bilmədi. Bu səhvlər Fabian Ruiz və Usman Dembele üçün fürsətə çevrildi və parislilər matçın ilk 10 dəqiqəsində artıq 2:0 hesabı ilə önə keçdilər.
“Real Madrid” PSJ-nin təzyiqinə cavab tapa bilmədi və Ruiz ilk hissə tamamlanmadan dubla imza ataraq hesabı 3:0-a çatdırdı. İlk hissədə vurulan üç qol və tam dominantlıq PSJ üçün kifayət etdi. Çempionlar Liqasının son qalibi ikinci hissədə rahat şəkildə oyunu nəzarətdə saxladı və Luis Enrike əsas futbolçularını istirahətə çıxarıb final üçün qorudu.
Xabi Alonsonun komandası da məğlubiyyəti qəbul etdi və o, öz sabiq komanda yoldaşı, “Real Madrid” əfsanəsi Luka Modriçə vida oyunu üçün şans verdi. Dani Karvaxal da zədədən sonra (25 oktyabr 2024-ci ildən bəri) ilk dəfə meydana çıxdı.
PSJ möhtəşəm çıxışını 87-ci dəqiqədə yekunlaşdırdı: Bredli Barkola soyuqqanlılıqla Qonsalu Ramosa ötürmə etdi və o da dördüncü qolu vurdu:
PSJ 4-0 Real Madrid
Fabian Ruiz 6' 24'
Dembele 9'
Ramos 87'
Qollar:
https://t.me/doxsanplus/105014
https://t.me/doxsanplus/105015
https://t.me/doxsanplus/105016
https://t.me/doxsanplus/105020
https://t.me/doxsanplus/105021
Enrikenin komandası bir daha sübut etdi ki, hazırda dünyanın ən güclü komandasıdır və bazar günü (13 iyul) baş tutacaq Klubların Dünya Çempionatının finalına “Çelsi”yə qarşı açıq favorit kimi çıxacaq.
