Misli Premyer Liqasının 32-ci turunda “Kəpəz” səfərdə “Araz-Naxçıvan”a 0:2 hesabı ilə uduzub. Matçdan sonra keçirilən mətbuat konfransında Gəncə təmsilçisinin baş məşqçisi Azər Bağırov qarşılaşmanı şərh edib.

90plus.az xəbər verir ki, təcrübəli mütəxəssis komandanın əsas məqsədə artıq çatdığını və bu səbəbdən heyətdə dəyişikliklər etdiyini bildirib:

“Minimum hədəfimizi yerinə yetirdiyimiz üçün bu gün bəzi rotasiyalar etdik. Mövsüm ərzində az forma şansı qazanan futbolçuları meydanda görmək istəyirdik. “Araz-Naxçıvan”ı qələbə münasibətilə təbrik edir, gələcək oyunlarda uğurlar arzulayıram”.

Baş məşqçi növbəti turda “Neftçi”yə qarşı keçiriləcək qarşılaşmadan da söz açıb. O, futbolçuların həmin oyuna əlavə motivasiyaya ehtiyac duymadığını deyib:

“Hər matç bizim üçün önəmlidir. Bu gün sadəcə daha az oynayan futbolçulara şans verdik. “Neftçi” ilə görüşə komandanın tam ciddi yanaşacağına inanıram. Düşünürəm ki, futbolçular həmin oyuna yaxşı hazırlaşacaqlar”.

Azər Bağırov növbəti matçda gənclərin yenidən şans qazanıb-qazanmayacağı ilə bağlı suala isə konkret cavab verməyib:

“Bunu zaman göstərəcək. Əsas istəyimiz azarkeşlərimiz önündə yaxşı oyun nümayiş etdirməkdir”.

“Kəpəz”in yeni rəhbərliyi barədə danışan baş məşqçi klubdaxili şəraitdə müəyyən müsbət dəyişikliklərin olduğunu qeyd edib:

“Keçən illə müqayisədə bəzi məsələlər daha yaxşı vəziyyətdədir. Rəhbərlikdə olan hər kəsə hörmətlə yanaşıram. Gələcəkdə hər şeyin daha da inkişaf edəcəyinə ümid edirəm. Futbolçular üçün şərait yaxşılaşdıqca nəticələr də yüksələcək”.