Azərbaycanın bədii gimnastika üzrə qrup hərəkətləri komandası “Paris-2024” Yay Olimpiya Oyunlarına vəsiqəni rəsmi olaraq təmin edib. 90plus.az xəbər verir ki, Beynəlxalq Gimnastika Federasiyası bu məlumatı elan edib. Zeynəb Hümmətova, Darya Sorokina, Güllü Ağalarzadə, Ləman Əlimuradova, Kamilə Əliyeva və Yelizaveta Luzandan ibarət komanda ölkəmizi 4 illiyin ən mötəbər turnirində təmsil edəcək. Builki qitə çempionatlarında qrup hərəkətləri komandaları arasında yalnız bir lisenziya oynanılırdı. Budapeştdə keçirilən Avropa çempionatında artıq Olimpiya Oyunlarına lisenziya qazanmış 3 komandadan sonra ən yüksək nəticəni Azərbaycan əldə etdiyinə görə “Paris-2024” Olimpiya Oyunlarında iştirak haqqı qazanan ən güclülər sırasında millimiz də yer alır.