FIFA yayda yox, qışda Dünya çempionatları keçirməyi planlaşdırır? ❄️
90plus.az xəbər verir ki, bu cümə axşamı FIFA prezidenti Canni İnfantino “Avropa Futbol Klubları” (EFC) təşkilatının Romada keçirilən konqresində iştirak edib. Görüş zamanı o, gələcək Dünya çempionatlarının noyabr-dekabr aylarında keçirilməsi ideyasını gündəmə gətirib — eynən 2022-ci ildə Qətərdə olduğu kimi.
FIFA rəhbəri bildirib ki, bu məsələ artıq ciddi şəkildə müzakirə olunur və məqsəd yay aylarında bəzi ölkələrdə müşahidə olunan ekstremal istilərə uyğunlaşmaqdır. İnfantino qeyd edib ki, ötən yay ABŞ-da keçirilən Klubların Dünya Çempionatında hava şəraiti futbolçular və azarkeşlər üçün çətinlik yaratmışdı.
🗣️ Canni İnfantino (FIFA prezidenti):
“Artıq bu məsələ ilə bağlı geniş müzakirələr aparırıq. Bu, təkcə bir Dünya çempionatı ilə bağlı deyil, ümumi bir baxışdır. Hətta bəzi Avropa ölkələrində belə iyul ayında oynamaq çox isti olur. Bəlkə də bu barədə düşünməliyik. Əslində Avropada futbol üçün ən yaxşı ay – iyun – çox da istifadə edilmir. Təqvimi optimallaşdırmaq yolları ola bilər, amma hələlik müzakirə mərhələsindəyik.”
“Əgər futbolu eyni vaxtda dünyanın hər yerində oynamaq istəyirsinizsə, bəlkə də mart və ya oktyabr ayları daha münasibdir. Çünki dekabrda dünyanın bir hissəsində oynamaq olmur, iyulda isə digər hissəsində. Milli komandalar, klub turnirləri və oyunçu buraxılışları baxımından hamı üçün balans tapmaq böyük bir çağırışdır.”
Bu müzakirələr fonunda 2034-cü il Dünya çempionatının Səudiyyə Ərəbistanında keçirilməsi qərarının da turnirin vaxtına təsir göstərə biləcəyi bildirilir. Qətərdə olduğu kimi, bu mundialın da ilin sonunda – payız və ya qış aylarında oynanması ehtimalı çox yüksəkdir.
🗞️ Mənbə: The Times, The Guardian
📍 90plus.az — Futbolun dünyasında ən son yeniliklər!
