Kurasaonun möcüzəsi: 150 min nəfərlik ada dövləti ilk dəfə Dünya çempionatına vəsiqə qazandı.
90plus.az xəbər verir ki, DÇ-2026-nın genişlənmiş formatı sensasiyaya yol açdı: Karib hövzəsinin kiçik adası Kurasao ilk dəfə olaraq Dünya çempionatında iştirak edəcək. Cəmi 150 mindən bir qədər çox əhalisi olan ada dövləti futbol tarixinə ən kiçik mundial iştirakçısı kimi düşdü.
Tarixi vəsiqə: Dünyanın ən kiçik mundial iştirakçısı
Kurasao bu gecə Yamayka ilə səfər matçında 0:0 hesablı heç-heçə edərək Conkakaf zonasında birbaşa vəsiqəni təmin edib.
Bundan əvvəl rekorda 2018-ci ildə final mərhələsinə yüksələn İslandiya sahib idi, lakin İslandiyanın həm əhalisi, həm də ərazi ölçüsü Kurasao ilə müqayisədə xeyli böyükdür.
Yamaykada dram, VAR qərarı və Maklarenin istefası
Stiv Maklarenin çalışdırdığı Yamayka yalnız qələbə qazanacağı təqdirdə DÇ-2026-ya vəsiqə əldə edəcəkdi.
Oyunun 90+4-cü dəqiqəsində penalti qərarı onlara ümid versə də, VAR epizodu yenidən dəyərləndirərək hakim İvan Bartona qərarını ləğv etdirdi.
Bu epizod Yamayka azarkeşlərinin hiddətinə səbəb olub. Qarşılaşmadan sonra Maklaren vəzifəsindən istefa verib.
78 yaşlı Dik Advokat tarixi "sındırır"
Şəxsi səbəblərə görə matçda iştirak etməyən Kurasao yığmasının baş məşqçisi Dik Advokat Dünya çempionatında iştirak edən ən yaşlı baş məşqçi olacaq – 78 yaşında.
Bu rekord 2010-cu ildə Yunanıstanı çalışdıran Otto Reksagelə məxsus idi (71 yaş).
FİFA reytinqində sıçrayış
Ada ölkəsi 2014-cü ildə FİFA reytinqində 150-ci pillədə qərarlaşırdı.
Bu gün isə Kurasao 82-ci yerdədir – inanılmaz yüksəliş....
DÇ-2026-nın genişlənməsi yeni tarix yazdı
48 komandadan ibarət yeni format, həmçinin Kanada, ABŞ və Meksikanın avtomatik vəsiqə alması KONKAKAF zonasında daha çox komanda üçün qapını açdı.
Beləliklə, Kurasao DÇ-2026-da debüt edəcək 4-cü yeni komanda oldu:
- Kabo-Verde
- Özbəkistan
- İordaniya
- Kurasao
“Bu, Kurasao üçün ən böyük hadisədir”
Yığmanın yarımmüdafiəçisi Juninyo Bakuna BBC-yə açıqlamasında emosional danışıb:
“Bu, inanılmazdır. Bir neçə il əvvəl belə bir şey xəyal belə edilə bilməzdi. Bu hekayənin bir parçası olmaq mənim üçün böyük şərəfdir.”
KONKAKAF zonasında digər vəsiqələr:
- Haiti – Nikaraqua üzərində 2:0 hesablı qələbə ilə 1974-dən sonra ilk dəfə mundiala vəsiqə qazandı.
- Panama – zonanın digər birbaşa iştirakçısı oldu.
- Yamayka isə şansını interkontinental pley-offda sınayacaq.
