Panama millisinin DÇ-2026 üçün yekun heyəti açıqlanıb. Siyahıda Azərbaycan Premyer Liqasının təmsilçisi “Turan Tovuz”un müdafiəçisi Roderik Miller də yer alıb.
90plus.az xəbər verir ki, Panama Futbol Assosiasiyasının yaydığı məlumata görə, milli komanda dünya çempionatına geniş heyətlə yollanacaq və bir neçə tanınmış legioner futbolçuya da yer verilib.
Qapıçı xəttində Orlando Mokera, Luis Mexia və Sezar Samudio yer alıb.
Müdafiə xəttində isə Sezar Blekmen, Xorxe Gutyerres, Amir Murillo, Fidel Eskobar, Andres Andrade, Edqardo Farinya, Xose Kordoba, Erik Deyvis, Covanni Ramos və "Turan Tovuz"dan Roderik Miller kimi futbolçular heyətə daxil edilib.
Yarımmüdafiədə Anibal Qodoy, Adalberto Carraskilya, Karlos Harvi, Kristian Martines, Xose Luis Rodriges, Sezar Yanis, Yoel Barsenas, Alberto Kintero və Azarias Londono yer alıb.
Hücum xəttində isə Ismael Dias, Sesilio Uotermen, Xose Faxardo və Tomas Rodriges çıxış edəcək.
Qeyd: Panama millisi DÇ-2026-da L qrupunda mübarizə aparacaq. Komandanın rəqibləri İngiltərə, Xorvatiya və Qana olacaq.
