Erlinq Haalandın 5 qol vurduğu görüşdə Norveç millisi rəqibini meydana çıxmağa peşman etdi:
Norveç 11-1 Moldova
90plus.az xəbər verir ki, Moldovanın qolu da norveçli oyunçu tərəfindən avtoqol kimi qeydə alındı.
Norveçin ulduzu Erling Haaland 5 qol vurdu, əvəzlənmədən oyuna daxil olan Telo Aasqard isə 4 dəfə fərqləndi və komanda Moldova üzərində 11:1 hesablı darmadağına imza ataraq 1998-ci ildən sonra ilk dəfə Dünya Çempionatının final mərhələsinə yüksəlmək yolunda böyük addım atdı.
Beş turdan sonra norveçlilər 15 xalla I qrupun lideridir. Onlardan 6 xal geri qalan İtaliya ikinci yerdədir və bir oyunu əskikdir. Moldova isə ən ağır məğlubiyyətini yaşayaraq xalsız son pillədə qərarlaşıb.
Qrup qalibləri birbaşa gələn il keçiriləcək Dünya Çempionatına vəsiqə qazanacaq, ikinci yeri tutan komanda isə pley-offda mübarizə aparacaq.
Haalandın zərif ötürməsi sayəsində Feliks Horn Mürhe artıq 6-cı dəqiqədə qapıya yaxın mövqedən hesabı açdı. Bir dəqiqə sonra Martin Edeqor fərqi artırmaq imkanı qazansa da, topu yaxın məsafədən yuxarı vurdu.
Norveçlilər çox gözləməli olmadılar – 11-ci dəqiqədə Haaland cərimə meydanında boş qalan topu götürərək uzaq küncə göndərdi. 36-cı dəqiqədə sürətli əks-hücumu tamamlayan Haaland ikinci qolunu vurdu və fasilədən əvvəl het-trikini rəsmiləşdirdi. Moldova qapıçısı Kristian Avram onu çətin vəziyyətə salsa da, Haaland topu saxlayıb uzaq dirəyə zərif “çip” zərbəsi ilə hesabı 4:0 etdi.
Birinci hissənin əlavə vaxtında Edeqor 5-ci qolu vurdu. İkinci hissənin 52-ci dəqiqəsində isə Haaland dördüncü dəfə fərqləndi – bu dəfə baş zərbəsi ilə.
Daha sonra oyuna qoşulan Aasqard iki dəfə ardıcıl qol vurdu. Onların arasında isə Leo Östiqardın avtoqolu qeydə alındı. 79-cu dəqiqədə Aasqard penalti ilə het-trikini tamamladı. Haaland isə Norveçin 10-cu qolunu vuraraq, DÇ seçməsində 5 oyunda 9-cu qoluna imza atdı.
Aasqard görüşün əlavə vaxtında daha bir gözəl toxunuşla hesabı 11:1 etdi.
Qeyd: Moldovanın qapısını "Araz Naxçıvan"ın 31 yaşlı oyunçusu Kristian Avram qoruyurdu.
