Van Bronxorst “Liverpul”dan ayrıla və İndoneziya millisinə keçə bilər.
90plus.az xəbər verir ki, “Liverpul”un köməkçi məşqçisi Ciovanni van Bronxorstun yaxın vaxtlarda komandadan ayrılaraq İndoneziya milli komandasının başına keçə biləcəyi iddia olunur. Xəbərə görə, İndoneziya Futbol Federasiyası Patrik Kluivertlə yolları ayırdıqdan sonra yeni baş məşqçi axtarır və əsas namizədlərdən biri van Bronxorstdur.
Məlumata əsasən, “Liverpul" rəhbərliyi də holland mütəxəssisin baş məşqçi kimi çalışma istəyinə anlayışla yanaşır və rəsmi təklif gəldiyi halda keçidə mane olmayacağı bildirilir.
Hazırda Arne Slotun köməkçisi kimi çalışan 50 yaşlı van Bronxorst daha əvvəl “Feyenoord”, “Reyncers” və “Beşiktaş” kimi klublarda fəaliyyət göstərib. Onun təcrübəsi səbəbindən İndoneziya millisinin baş məşqçi postu üçün favoritlərdən biri olduğu deyilir.
Danışıqların davam etdiyi bildirilir, lakin hələlik rəsmi qərar açıqlanmayıb.
