"Yaxşı oyun oldu. Matça əla başladıq. Başlanğıcda daha aqressiv olmalıydıq. Bu oyun üçün bütün planlarımızı yerinə yetirə bildik. Futbolçularımı təbrik edirəm". 90plus.az xəbər verir ki, bu sözləri "Neftçi"nin baş məşqçisi Laurentsiu Regekampf Misli Premyer Liqasının 25-ci turunda bu gün "Turan Tovuz"a 4:0 hesabı ilə qalib gəldikləri oyundan sonra mətbuat konfransında deyib. O, kubokda "Turan Tovuz"un onlara rəqib olması ilə bağlı bildirib: "Kubokda da döyüşmək lazım olacaq. Bu turnir biraz fərqlidir. İlk matça hələ çox var. Qarşıdakı oyunlara köklənməliyik". Rumıniyalı mütəxəssis zədəlilərin sıraya dönməsindən sonra komandasının istədiyi oyunu sərgilədiyini qeyd edib: "Çalışırıq, son oyunlarda bütün oyunçuları öz mövqelərində oynadaq. Heyətə baxdıqda demək olar, zədəli futbolçumuz yox idi. Bir neçə oyundur, eyni heyətlə çıxa bilirik. Bunu görə bilərsiniz. Yaxşı oyunçularımız var, məşqlərimizin səviyyəsi də artıb. Xoşbəxtəm. Sezar Meza Kolli qayıtdı, qol vurdu. Eddi İsrafilov da neçə oyundur, bizimlədir. Kenni Sayef, Vato Arveladze, Mateus Saldanya da yaxşı formadadır. Emin Mahmudov da formasını bərpa edir. Bizim oyunumuz daha yaxşılaşır". Baş məşqçi kapitan Emin Mahmudovun komandadan ayrılacağı ilə bağlı yayılan xəbərlərə münasibət bildirib: "Emin təlim-məşq toplanışında zədə almışdı. Ona görə performansında eniş var idi. Lakin son zamanlarda məşqləri ağrısız keçirir. Və siz həqiqi Emini görürsüz. Sizi əmin edə bilərəm ki, Emin komandada qalmaq istəyir. Mənim də arzum budur. O, peşəkar futbolçudur. Bu cür xəbərlərlə çox qarşılaşıb. Bu haqda çox danışmalı deyilik. Eminin üzərində təzyiq yaratmalı deyilik. O, özü və ailəsi üçün ən yaxşı qərar nədirsə, onu seçəcək". Regekampf  komandaya yayda gələn Vato Arveladzenin fərq yarada bilməməməsi haqd sualı belə cavablandırıb: "Vatoya ümidim böyükdür. Topla rahat rəftar edir. Öz mövqeyi uğrunda daha çox mübarizə aparmalıdır. Vato mükəmməl oyunçu ola bilər. Onda bu keyfiyyət və xarakter var. Lakin son 2-3 ildə çox zədə alıb. Buna görə ona bir az da vaxt lazımdır".