"Qalatasaray" Fernando Musleranı gözləyir. “Trabzonspor” matçında zədələnən uruqvaylı qapıçı liqaya verilən fasilə sayəsində matçı buraxmayacaq. 90plus.az “Trt Spor”a istinadən xəbər verir ki, Türkiyə Super Liqasının 23-cü həftəsində Trabzonspor mübarizəsində zədələnən təcrübəli qolkiperin təxminən 1 aya yaxın meydandan uzaq qalacağı gözlənilirdi. Sağ ayaq sümüyündən zədələnən Musleranın bu prosesdə 3-4 matçı buraxacağı düşünülürdü. Uruqvaylı qolkiperin meydana çıxa bilməyəcəyi vaxtda rəhbərlik müvəqqəti transfer etməyi planlaşdırırdı. Türkiyə Futbol Federasiyasının zəlzələ səbəbindən liqanı mart ayına təxirə salmasından sonra bu transferdən imtina edilib. "Qalatasaray" liqanın 24-cü həftəsində səfərdə "Qaziantep" ilə qarşılaşacaqdı. Ancaq rəqib zəlzələ fəlakəti səbəbindən liqadan çəkildiyi üçün sarı-qırmızılı komanda həftəni matçsız keçirəcək. "Qalatasaray" liqanın 25-ci həftəsində ilk rəsmi matçında "Kasımpaşa"nı qəbul edəcək. Martın 11-də keçiriləcək görüşdə Fernando Musleranın formasını bərpa edəcəyi gözlənilir.