ABŞ prezidenti ilə FIFA-nın rəhbəri – maraqları üst-üstə düşən iki şəxs Klubların Dünya Çempionatı turniri boyunca mehriban münasibətlər sərgiləyiblər və bir-birilərinə xoş sözlər ünvanlayıblar. Onlar bazar günü keçiriləcək Paris Sen-Jermen – Çelsi finalını birgə izləməyi planlaşdırırlar.

90plus.az xəbər verir ki, ABŞ prezidenti Donald Tramp Meksika körfəzinin adını “Amerika körfəzi” olaraq dəyişmək istədiyini açıqlayanda FIFA prezidenti Canni İnfantino gülməkdən özünü saxlaya bilməyib. Yanvarın 20-də Trampın andiçmə mərasimində iştirak edən yeganə tanınmış idman rəhbəri olan İnfantino həmin tədbirdə Trampı təriflərə qərq edib və Vaşinqtona dəvət olunmağı “inanılmaz şərəf və imtiyaz” adlandırıb. FIFA rəhbəri Ağ Ev sahibinin rəğbətini qazanmaq üçün bütün vasitələrə əl atır, Tramp isə bu münasibətə qarşılıq verir.

Son aylar ərzində bu iki şəxs bir neçə dəfə ictimai şəkildə səmimi münasibətlərini nümayiş etdirib və qarşılıqlı təriflərlə çıxış ediblər. İtalyan-İsveçrə əsilli İnfantino Trampı “dünyanın ehtiyacı olan lider” adlandıranda, ABŞ prezidenti də cavabında onu “xüsusi dost”, “qalib” və “mükəmməl insan” kimi təqdim edib.

İki tərəf arasındakı yaxın münasibətin simvolik göstəricisi kimi, FIFA prezidenti ilə ABŞ prezidenti 13 iyul bazar günü Nyu-York yaxınlığındakı “MetLife” stadionunda keçiriləcək Klubların Dünya Çempionatının finalında yanaşı əyləşəcək. Onlar birlikdə, ABŞ-ın 11 şəhərində keçirilən turnirin qalibinə kuboku təqdim edəcəklər.

Beş gün öncə isə İnfantino ABŞ prezidentinin ikinci oğlu Erik Trampla birlikdə Nyu-Yorkdakı Tramp Tauer binasında FIFA-nın yeni ofisinin açıldığını elan etmişdi.

Qeyd: Bu gün Bakı vaxtilə saat 23:00-da keçiriləcək həlledici görüşdə “Çelsi” və PSJ dünyanın ən güclü klubunu müəyyənləşdirəcək.