"Son vaxtlar çox qol buraxırıq. Buna görə iradlarımı bildirirəm". 90plus.az - ın məlumatına görə, bunu "Qarabağ"ın baş məşqçisi Qurban Qurbanov səfərdə "Qəbələ"yə 3:1 hesabı ilə qalib gəldikləri Azərbaycan Premyer Liqasının XXV tur oyunundan sonra mətbuat konfransında deyib. 51 yaşlı mütəxəssis qol buraxmalarının əsas qapıçı Şahruddin Məhəmmədəliyevin yoxluğu ilə bağlı olmadığını bildirib: "Başlıca səbəblər müdafiədə diqqətsizliyimiz və rəqiblərin hücumda yaxşı oynamasıdır. Bütün komandalar hücumameyilli oyun sərgiləyirlər. Əvvəl bizə qarşı sıx müdafiə olunurdular. İndi isə daha çox hücum edirlər. Ümumiyyətlə, səhvlərimizə xüsusi diqqət ayırırıq". O, səfərdə vacib qələbə qazandıqlarını söyləyib: "Gərgin və maraqlı matç izlədik. Futbolçularımdan razı qaldım. Sarı vərəqələrlə bağlı diqqətli olmalarını demişdim. Ancaq bu, oyunun gərginliyindən irəli gələn məsələdir. Bəzi futbolçularımızın olmamasına rəğmən, dinamik oyun göstərdik". Təcrübəli baş məşqçi rəqib haqqında xoş fikirlər səsləndirib: "Bu komanda öz oyun üslübunu yaxşılaşdırıb. Əks-hücumlarda, müdafiənin arxasına atılan toplarda çox təhlükəlidir. Bir neçə epizodda bunun şahidi olduq. Qurbanov "Qarabağ" nə vaxt pik formada olacaq" sualına bu cür cavab verib: "Bunu dəqiq deyə bilməyəcəyəm. Bizim düşünmədiyimiz hadisələr olur. Hücum xəttində dəyişiklik etmək üçün oyunçumuz azdır. Adama Diakabi, Yassin Benzia zədəlidir. Futbolçular yaxşı formaya yaxınlaşırdılar. Çempionatın sonuna yaxın daha ideal komanda görə bilərik". Mütəxəssis hakimlərin idarəçiliyinə də toxunub: "Hakimlikdən razı qalmadığım vaxt olmayıb. Bugünkü oyunda da narazılıq bildirmədim. Sadəcə dedim ki, çox bəsit sarı kartlar verirsən. 15-20 dəqiqəyə orta xətt oyunçularımıza "sarı" göstərdi. Belə olan halda aqressivlik azalır. Hakimləri də başa düşmək olur. Matçlar gərgin keçir. Futbolçuların qışqırması, yıxılması onları aldadır. Ümumi olaraq, fikirlərim normaldır". O, Qara Qarayevin az oynamasından da söz açıb: "Qaranın meydana çıxdığı matçlar az olmayıb. Hər futbolçunun oynamaq ehtimalı var. Qarşıda Qaranın əsas heyətdə oynayacağı görüşlər də olacaq". Qurbanov AFFA İcraiyyə Komitəsinin qarşıdakı iclasında hər hansı təklif verməyəcəyini vurğulayıb: "Bu, mənə aid məsələ deyil". Baş məşqçi yayada komandanı gücləndircəklərini istisna etməyib: "Transfer etmək fikrimiz var. Daim liderliyi qoruyub-saxlamaq, Avropada yaxşı nəticələr əldə etmək istəyiriksə, heyəti genişləndirməliyik. Bu gün 23 futbolçuya sahibik. Lakin Avropa oyunlarında görürük ki, nə qədər çatışmazlıqlarımız var. Bəzən futbolçular böyük oyunlarda güclərini çatdıra bilmirlər. Bunun nəticəsində Diakabi, Yassin Benzia kimi futbolçular zədələnir. Yay aylarında dəyişikliklər gözlənilir".