Rəşad Sadıqov: “Bu gün məğlub olsaq da, özümü qalib kimi hiss edirəm”.
90plus.az xəbər verir ki, UEFA Konfrans Liqasının 2-ci təsnifat mərhələsində Xorvatiyada “Hayduk”a əlavə vaxtda məğlub olan “Zirə” (1:2, ilk oyun – 1:1) turnirdəki çıxışını dayandırdı. Lakin komandanın baş məşqçisi Rəşad Sadıqov səfər matçında futbolçularının ortaya qoyduğu iradə və xarakterdən qürur duyduğunu bildirib.
Görüşdən sonra keçirilən mətbuat konfransında təcrübəli mütəxəssis məğlubiyyətə rəğmən yetirmələrinin oyunundan razı qaldığını qeyd edib:
“Komandamıza göstərdikləri əzmkar, mübariz oyuna görə təşəkkür etmək istəyirəm. Dünən də demişdim ki, böyük azarkeş qarşısında oynamaq bizim üçün zövq olacaq. Rəqibin gücünə baxmayaraq, ilk dəqiqələrdən aqressiv oynamağa çalışdıq və bu bizdə yaxşı alınırdı”.
Sadıqov komandasının oyunun taleyini həll edən məqamları da təhlil edib. Onun sözlərinə görə, hesabın açılmasına səbəb kiçik bir boşluq və Marko Livayanın ustalığı olub:
“Ani diqqətsizlikdən sonra qol buraxdıq. Amma oyunumuza sadiq qaldıq, yenə də irəli atılırdıq. Ən vacib anda qırmızı vərəqə alıb azlıqda qaldıq. Buna baxmayaraq, bərabərlik qolunu vurduq. Əlavə vaxtda 10 nəfərlə oynamaq asan deyil. Futbolçularım can qoydu. Sadəcə, rəqib cərimə zərbəsindən mükəmməl istifadə etdi”.
Görüşün əlavə vaxtında vurulan həlledici qola toxunan çalışdırıcı təəssüf hissini gizlətməyib:
“Əlavə vaxtın ilk dəqiqəsində cərimə zərbəsi təyin olundu və biz 95-ci dəqiqədə yenidən qol buraxdıq. Əgər o top qapımızdan keçməsəydi, oyunun axını dəyişə bilərdi. Rəqibin üzərində təzyiq artır, biz isə əks-hücumlarla daha təhlükəli ola bilərdik”.
Son olaraq Rəşad Sadıqov bu məğlubiyyətin onların böyüməkdə olan komanda olduqlarını bir daha göstərdiyini vurğulayıb:
“Futbolçularımı bağrıma basıram. Bu oyun sübut etdi ki, inkişaf edirik. Gündən-günə böyüyürük. Bəli, bu gün məğlub olduq, amma mən özümü qalib kimi hiss edirəm”.
